«Մեր խնդիրն այս պրոցեսում ոչ թե՝ Սերժ Սարգսյանին իշխանությունից հեռացնելն է, այլ՝ Սերժ Սարգսյանի վերադարձն իշխանության թույլ չտալն է». Նիկոլ Փաշինյան
Այսօր տեղի ունեցած ասուլիսի ժամանակ լրագրողները «Ելք» խմբակցության ղեկավար, «Քաղաքացիական պայմանագիր» կուսակցության անդամ Նիկոլ Փաշինյանին հիշեցրեցին, որ նա ասել է, որ քաղաքացիներին իշխանափոխություն կխոստանա միայն մեկ անգամ:
Հարցին՝ հիմա Դուք խոստանո՞ւմ եք իշխանափոխություն, Ն. Փաշինյանն այսպես պատասխանեց. «Վաղը մենք մեր ճանապարհային քարտեզը կներկայացնենք, և դրանից ուղիղ 10 օր հետո Սերժ Սարգսյանն իշխանությունից հեռացած կլինի:
Ապրիլի 10-ին նա իշխանություն չի ունենալու: Մեր խնդիրն այս պրոցեսում ոչ թե՝ Սերժ Սարգսյանին իշխանությունից հեռացնելն է, այլ՝ Սերժ Սարգսյանի վերադարձն իշխանության թույլ չտալն է:
Ամսի 9-17-ը Սերժ Սարգսյանը ՀՀ-ում որևէ պաշտոն չի ունենալու: ՀՀ-ում կառավարություն չի լինելու, լինելու են պաշտոնակատարներ:
Արմեն Սարգսյանը ստանձնելու է պաշտոնը, բայց նա ոչ մի գործառույթ չունի ուժային և մյուս կառույցների նկատմամբ: Ազգային ժողովն այդ ուղղությամբ նույնպես լիազորություն չունի: Եթե ՀՀ քաղաքացին որոշի հաղթել, կհաղթի»:
Լրագրողներից մեկը նաև հիշեցրեց, որ խորհրդարանական ընտրություններից հետո խոսելով փողոցային պայքարի մասին՝ Ն. Փաշինյանն ասել է, որ այն մարդիկ, ովքեր 10 հազար դրամով իրենց ձայնը տվել են ՀՀԿ-ի օգտին, 10 հազար կամ ավելի պակաս դրամով էլ կարող են հրապարակից տուն գնալ:
Հարցին՝ այդ մեկ տարվա մեջ մեր քաղաքացիները փոխվե՞լ են, որտե՞ղ է երաշխիքը, որ հետ չեն գնա տուն, Ն. Փաշինյանն այսպես պատասխանեց. «Քաղաքական և հանրային զարգացումը փոփոխությունների գործընթաց է: Մենք էլ ենք փոխվում, մենք էլ ենք փոխվել, ու կփորձենք քաղաքական այնպիսի պրոցես հարուցել, որն ինչպես մեզ կփոխի, այլև՝ կտա հնարավորություն ազատագրվել ընտրակաշառքի գերությունից: Սա սկզբունքային հարց է»:
