Երևանի ոռոգման համակարգն ընդլայնվելու է
Երևանի զարգացման հնգամյա ծրագրով առաջիկա տարիներին աշխատանքներ կտարվեն նաև մայրաքաղաքի ոռոգման համակարգի ընդլայնման ուղղությամբ:
Ընդհանուր օգտագործման կանաչ տարածքների ավելացման նպատակով 2018 թվականի ծրագրով մայրաքաղաքի ոռոգման ցանցը կերկարի ևս շուրջ 5 կիլոմետրով: Մասնավորապես, Արաբկիր վարչական շրջանում նոր խողովակաշար է անցկացվում Մանկական զբոսայգուց մինչև Հրազդան գետն իջնող հատված, որտեղ այն կմիանա նորաստեղծ պոմպակայանին:
Արդյունքում՝ գետից պոմպով մղվող ջուրը կոռոգի Փափազյան, Խաչատրյան, Դեմիրճյան փողոցներին, ինչպես նաև Կոմիտասի, Բաղրամյան պողոտաներին հարակից կանաչ տարածքները: Նոր ջրագիծ կստեղծվի նաև Կենտրոն վարչական շրջանի Մոսկովյան փողոցից մինչև Նալբանդյան փողոց ընկած հատվածում գտնվող կանաչ տարածքների ոռոգման նպատակով:
Շենգավիթ վարչական շրջանի Մանանդյան և Շիրազի փողոցներին հարակից տարածքների համար նույնպես կկառուցվի ոռոգման նոր ջրագիծ: Այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից:
Հարկ է նշել, որ վերջին տարիներին բակերի համալիր բարեկարգման և նոր այգիների ու պուրակների ստեղծման աշխատանքներում ևս առանձնահատուկ ուշադրություն է դարձվում ոռոգման ցանցերի անցկացմանն ու կանաչ տարածքների ընդլայնմանը:
