«Համաշխարհային փորձը ցույց է տվել, որ այս ոլորտի արդյունավետ կարգավորումը գործնականում անհնար է». Կարայան
Հայաստանի կառավարությունը բացասական եզրակացություն տվեց «Թվային տեխնոլոգիաների զարգացման մասին» և «Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» ՀՀ օրենքում փոփոխություններ եւ լրացումներ կատարելու մասին» օրինագծերին: ՀՀ տնտեսական զարգացման եւ ներդրումների նախարար Սուրեն Կարայանը նշեց, որ օրինագիծը սահմանում է «մայներ» հասկացությունը, մայներների նկատմամբ հարկային արտոնություններ է սահմանում, ինչպես նաև պահանջներ է նախատեսում դրանց գրանցման մասով: Կարայանի խոսքով, օրինագիծը ոլորտը կարգավորող իրավական նորմեր չի պարունակում:
«Օրինագիծը վերաբերում է միայն մայնինգի գործընթացներին, կրիպտոարժույթների թողարկմանն ու վաճառքին, մինչդեռ թվային տեխնոլոգիաները լայն հասկացություն են: Այս կապակցությամբ կրիպտոարժույթների ոլորտը կարգավորող օրինագծի ընդունումը նպատակահարմար չէ՝ հաշվի առնելով այս հարցի վերաբերյալ միջազգային դիրքորոշումը. առաջատար երկրների մեծամասնությունը կոչ է անում ձեռնպահ մնալ կրիպտոարժույթներով գործարքներից»,- ասաց Կարայանը:
Նրա խոսքով՝ համաշխարհային փորձը ցույց է տվել, որ այս ոլորտի արդյունավետ կարգավորումը գործնականում անհնար է. ոչ մի երկիր կամ միջազգային կազմակերպություն կրիպտոարժույթների կառավարման և վերահսկողության հստակ ու համալիր մոտեցումներ դեռ չի մշակել, որոնք թույլ կտան արդյունավետ կերպով զսպել եւ կառավարել դրանց բնորոշ ռիսկերը:
«Օրինագծի ընդունումը նպատակահարմար չէ՝ հաշվի առնելով ռիսկի մի շարք գործոններ, ինչպիսիք են փողերի լվացումը և ահաբեկչության ֆինանսավորումը, խարդախությունը, հաքերային հարձակումները, սպառողների շահերի խախտումը, կրիպտոարժույթների գների բարձր տատանողականությունը», – ասաց Կարայանը:
