Ե՞րբ են արձակուրդ գնալու Հայաստանի ղեկավաները
Հայաստանի ղեկավաները դեռևս չեն հստակեցրել` ե՞րբ են գնալու արձակուրդ և որտե՞ղ են անցկացնելու իրենց հանգիստը:
168.am-ի հետ զրույցում ՀՀ վարչապետի մամուլի քարտուղար Արամ Արարատյանը տեղեկացրեց, որ Կարեն Կարապետյանն այդ մասին չի էլ խոսել:
«Դեռ նման հարց չկա նրա օրակարգում, սովորական ռեժիմով աշխատում է»,- ասաց նա:
Դիտարկմանը` հնարավո՞ր է՝ Կ.Կարապետյանն ընդհանրապես չգնա արձակուրդ, Ա.Արարատյանը պատասխանեց. «Կարող է և չգնա»:
ՀՀ նախագահ Սերժ Սարգսյանի մամուլի քարտուղար Վլադիմիր Հակոբյանի հետ մեզ չհաջողվեց կապ հաստատել:
Նկատենք, որ Սերժ Սարգսյանը սովորաբար գնում է կարճատև արձակուրդ:
ԱԺ նախագահ Արա Բաբլոյանի հանգստի մասին նույնպես ոչինչ չի հրապարակվել: ԱԺ հասարակայնության և տեղեկատվության միջոցների հետ կապերի վարչության պետ Արսեն Բաբայանը մեզ խոստացավ երկուշաբթի օրը ճշտել և տեղեկացնել:
Ի դեպ, սա Արա Բաբլոյանի և Կարեն Կարապետյանի` այս պաշտոններում առաջին արձակուրդն է լինելու: Եթե, իհարկե, նրանք գնան արձակուրդ:
