«ՀՀ-ԵՄ նախաստորագրված փաստաթուղթը հիմք է հանդիսանալու ավելի ծավալուն համագործակցության փաթեթ մշակելու համար». Գարեգին Մելքոնյան
«ՀՀ-ԵՄ ամբողջ գործիքակազմը ողջ թափով իրականացվում է»,- այս մասին լրագրողների հետ զրույցում ասաց ՀՀ Էկոնոմիկայի փոխնախարար Գարեգին Մելքոնյանը՝ անդրադառնալով ԵՄ-ի կողմից տրվող աջակցությանը Հայաստանին։
Փոխնախարարը տեղեկացրեց, որ անցած տարևեվերջին և այս տարվա սկզբին Եվրոպական միության հետ Հայաստանը ստորագրել է համաձայնագրերի փաթեթ, որով նախատեսվում է 51 միլիոն եվրոյի աջակցության ծրագիր իրականացնել այս տարի և առաջիկա տարիների ընթացքում։ Ըստ նրա՝ դրա զգալի մասը՝ մոտավորապես 50 միլիոնը, բյուջետային աջակցության ծրագիր է, որի շրջանակներում անցած տարի եղել է աննախադեպ բարձր ֆինանսական հատկացում պետական բյուջեին՝ 27,5 միլիոն եվրո։
«Բոլոր գումարներն անխտիր գրանտային միջոցներ են, և նույնիսկ բյուջետային աջակցության պարագայում մենք պետական պարտքի վրա որևէ լումա չենք ավելացնում։ Բացի բյուջետային աջակցության ծրագրից, առկա են նաև մի քանի այլ գործիքներ՝ ԵՄ-ի կողմից ֆինանսավորվող և ԵՄ աջակցությամբ ՀՀ-ում իրականացվող, դրանք են «Թվինինգ»-ը, «ԹԱԷՔՍ»-ը, «Սիգման», Սևծովյան ավազանի անդրավազանի սահմանային համագործակցության ծրագիրը, վերջում ավելացված «Սոսյու» ծրագիրը, որը սոցիալական ոլորտին է առնչվում, և 2 խոշոր մեծ գործիք, որին Հայաստանն անդամակցեց՝ ստորագրելով համապատասխան փաստաթուղթ, դա «Կոսմե» ծրագիրն էր՝ փոքր և միջին ձեռնարկատիրության ոլորտին առնչվող, և հայտնի «Հորիզոն 20/20»-ը՝ կրթության և գիտության ոլորտին առնչվող։ Ամբողջ գործիքակազմը ողջ թափով իրականացվում է, և ես հույս ունեմ և որոշակի վստահություն, որ նոր նախաստորագրված համաձայնագիրը հիմք է հանդիսանալու հետագա տարիների փաթեթը մշակելիս ավելի ծավալուն համագործակցության փաթեթ մշակելու համար»,- լիահույս է Գարեգին Մելքոնյանը։
