«Գիրք կարդում եմ, բանավիճում եմ, թեյ ըմպում եմ». Կարեն Կարապետյան
«Մի ամսվա մեջ մեծ փորձ ենք հավաքել ու կարող ենք լսարանի մոտ ժամերով խոսել և ներկայացնել մեր ծրագրերը»,- այսօր կենտրոնի բնակիչների հետ հանդիպումն այսպես սկսեց վարչապետ Կարեն Կարապետյանը։
Բնակիչներից մեկի` Հյուսիս-Հարավ մայրուղու շինարարության վերաբերյալ հարցին վարչապետը պատասխանեց. «Մենք ունենք արտաքին պարտք, որը կազմում է մեր ՀՆԱ-ի 57%ը։ Հյուսիս-հարավ ճանապարհը մեզ պե՞տք է, թե՞ չէ. այո՛, պետք է։ Բայց պետք է հաշվարկենք, թե որ վարկն է մեզ համար հավելյալ արժեք ստեղծում։
Այդ ճանապարհի հետ կապված քննարկում ենք, թե որ կտորները կարող ենք միացնել, որպեսզի այդ փողը պետության վրա չնստի ու համապատասխան դոնոր կազմակերպությունների հետ քննարկում ենք մեր հետագա քայլերը»։
Հայաստան-Իրան ոռոգման ջրատարի կառուցման մասին հարցին ի պատասխան էլ՝ Կարեն Կարապետյանն ասաց, որ հնարավոր համարում է, որ այդ տարբերակը կաշխատի. «Երբ իրանական կողմի հետ բանակցություններն ավարտենք` այդ հարցին կպատասխանենք»։
«Գիրք կարդում եմ, բանավիճում եմ, թեյ ըմպում եմ»,- ընտրողներից մեկի հարցին էլ, թե այդ երեքից որի կրողն է համարում իրեն, այսպես պատասխանեց վարչապետը։ Իսկ իր ոճային կերպարի մասին հարցին էլ պատասխանեց, որ երբեք չպետք է խաբել գործընկերներին, քանի որ, ըստ նրա` դա ստեղծում է «ռեպուտացիա»։
