Թրամփն իրեն համարել է ԶԼՄ-ների կողմից խտրականության՝ պատմության մեջ ամենախոշոր արշավի զոհը
ԱՄՆ-ի նախագահ Դոնալդ Թրամփն իրեն համարում է ամերիկյան զանգվածային լրատվամիջոցների կողմից խտրականության՝ պատմության մեջ ամենախոշոր արշավի զոհը: Այս մասին պետության ղեկավարը հայտարարել է Fox News հեռուստաալիքին տված հարցազրույցում:
«Ես խոսում եմ մոգոնված նորությունների մասին, որոնք քիչ չեն: Դրանք (ԶԼՄ-ները) հիանալի հասկանում են, թե ինչ եմ ես ասում եւ հատկապես ինչ եմ նկատի ունենում»,-ասել է նա՝ որպես առավել ցայտուն օրինակ նշելով The New York Times եւ The Washington
Post թերթերը, CBS, NBC եւ CNN հեռուստաընկերությունները:
«Պատմության մեջ դեռ չի եղել մի մարդ, ում մասին զանգվածային լրատվամիջոցները հրապարակեին այդքան շատ անազնիվ նյութեր, որքան իմ մասին: Ինչի մասին էլ որ խոսք լինի, ինչ դրական կամ հիանալի բան էլ որ հիշատակվի, նրանք այդ մասին գրում են բացասական տեսանկյունով», -գանգատվել է նախագահը, հաղորդել է ՏԱՍՍ-ը:
