Տիգրան Մուկուչյանը չի ցանկանում մեկնաբանել
Կենտրոնական ընտրական հանձնաժողովի նախագահ Տիգրան Մուկուչյանը չի ցանկանում իր տեսակետը հայտնել քաղաքական ուժերի համաձայնության արդյունքում Ընտրական օրենսգրքում կատարվելիք փոփոխությունների վերաբերյալ, որոնք վերաբերում են ստորագրված ընտրացուցակերի հրապարակմանը և ընտրական ողջ գործընթացի տեսանկարահանմանը: Լրագրողների հետ զրույցում ԿԸՀ նախագահն ընդգծեց, որ ցանկացած օրենսգրքի վերաբերյալ որևէ տեսակետ ներկայացնելը նշանակում է գնահատականներ տալ նշված կանոնակարգումներին, որոնք ամրագրված են օրենսգրքում:
«Հատկապես այն դեպքում, երբ այդ նախագիծը մշակվել է՝ հիմքում ունենալու քաղաքական ուժերի միջև համաձայնությունը, որևէ տեսակետ ներկայացնելու կարիք չկա: Այստեղ ավելի կարևոր են օրենսդրական կանոնակարգումները, քան ինչ-որ մասնագիտական գնահատականները կամ կարծիքները»,- նշեց Մուկուչյանը:
Նրա խոսքով՝ այս դեպքում ԿԸՀ-ն առաջին հերթին պետք է կյանքի կոչի օրենքի պահանջները: «Իմ անձնական կարծիքը ես բազմաթիվ անգամներ հնչեցրել եմ, սակայն իմ անձնական կարծիքը մեկ այլ խնդիր է, օրենսդրական կանոնակարգումը՝ բոլորովին այլ խնդիր: Եթե օրենքում ամրագրվում է նման կանոնակարգում, ապա ԿԸՀ-ն՝ որպես պետական մարմին, պարտավոր է կյանքի կոչել օրենքում ամրագրված դրույթները»,- եզրափակեց ԿԸՀ նախագահը:
Ազգային ժողովի 5 խմբակցություններ և ՀՀ կառավարության աշխատակազմի ղեկավար-նախարար Դավիթ Հարությունյանը համաձայնագիր են ստորագրել, ըստ որի` նախատեսվում է Ընտրական օրենսգրքում կատարել փոփոխություններ, որոնք ենթադրում են ընտրություններից հետո ստորագրված ընտրացուցակների հրապարակում, ընտրական ողջ գործընթացի տեսանկարահանում և օնլայն հեռարձակում, ինչպես նաև տարբեր ընտրախախտումների համար պատիժների խստացում: Համապատասխան օրենսդրական փոփոխությունների նախագիծն առաջիկայում կներկայացվի խորհրդարանի քննարկմանը:
