Ադրբեջանի դեմոկրատական ուժերը դեմ են Ալիեւի իշխանությունը երկրարացնելու սահմանադրական փոփոխություններին
Ադրբեջանի ընդդիմության եւ դեմոկրատական ուժերի «Ազգային խորհուրդ»
կառույցը լուրջ անհանգստություն է հայտնել երկրի նախագահի
լիազորություններն ընդլայնելու հարցով հանրաքվե անցկացնելու մասին նախագահ Իլհամ Ալիեւի նախաձեռնությանը:
Ինչպես հաղորդում է «Արմենպրես»ը` վկայակոչելով «Թուրան»ը, Ադրբեջանի ժողովրդավարական ուժերը գտնում են, որ երկրի սահմանադրության մեջ առաջարկված փոփոխությունները, փաստորեն, տանում են իշխանության
բռնատիրության երկարաձգմանը եւ պետության դեմոկրատական ինստիտուտների էլ ավելի թուլացմանը:
Սեփական իշխանությունը երկարացնելու Ալիեւի այդ քայլի հետ կապված «Ազադլըգ»ը գրել է, որ ընդդիմադիր քաղաքական առաջնորդները, իրավապաշտպանները Ալիեւի նախաձեռնությունը գնահատել են որպես
«հետադիմական փոփոխություն», փախուստ ժողովրդավարությունից, բռնատիրության ճանապարհ բացող հանգամանք, ինչից պարզ է դառնում, որ իշխանության նպատակը ոչ թե երկրում բարեփոխումներ անցկացնելն է,
հակաճգնաժամային միջոցառումներ պատրաստելը, այլ ժառանգական իշխանության երկարացումը:
Meydan TV հեռուստաալիքին տված հարցազրույցում Ադրբեջանի Ժողովրդական ճակատ կուսակցության առաջնորդ Ալի Քերիմլին այդ առնչությամբ հայտարարել է, որ Ալիեւի առաջարկած Ադրբեջանի սահմանադրության փոփոխությունները իշխանության վախի մեջ լինելու ցուցանիշն է:
Նրա խոսքով` այդ փոփոխությունների գլխավոր նպատակը Ալիեւի` իրեն ցանկալի չափով իշխանության մեջ մնալու համար պայմանի ստեղծումն է, եւ հետո էլ իր ուզած ժամանակ հեշտությամբ, առանց որեւէ մեկի հետ խորհրդակցելու,
առանց սահմանափակման, ազատորեն` իր ընտանիքի անդամներից մեկին իշխանության փոխանցման համար իրավական մեխանիզմի ստեղծումն է:
«Գլխավոր նպատակը սա է: Դրա համար առաջինը նախագահության ժամկետը 5ից հասցվում է 7-ի, հետո էլ փոխնախագահի պաշտոն է սահմանվում: Ինչպես երեւում է` դա էլ նախատեսվում է ընտանիքի անդամներից մեկի ուրիշի համար: Հետո էլ վերացվում է եւ’ պատգամավոր, եւ’ նախագահ ընտրվելու համար տարիքային սահմանափակումը: Նշանակում է, կանաչ լույս է վառվում ընտանիքի ավելի երիտասարդ անդամների համար: Ամեն ինչ արվում է այդ ընտանիքի ավելի երկար ժամկետով իշխանության մեջ մնալու համար», - համոզմունք է հայտնել Քերիմլին:
Արդեն երրորդ ժամկետ ընտրված Ադրբեջանի նախագահ Իլհամ Ալիեւը հուլիսի 18ին եզրակացություն ստանալու նպատակով դիմել է Սահմանադրական դատարան՝ Սահմանադրության մեջ փոփոխություններ կատարելու համար հանրաքվե կազմակերպելու հարցով: Փոփոխություններն ուղղված են նախագահի լիազորությունների ընդլայնմանը:
Փաստաթուղթը նախատեսում է Ադրբեջանում առաջին փոխնախագահի եւ փոխնախագահների ինստիտուտի հիմնում:
Ադրբեջանում գործող օրենսդրության հետ փոփոխության տարբերությունը կայանում է նրանում, որ եթե երկրի վարչապետը հաստատվում է խորհրդարանի կողմից, ապա առաջին փոխնախագահին նշանակում է անձամբ պետության ղեկավարն առանց որեւէ համաձայնեցման:
Բացի այդ, առաջարկվում է նախագահի լիազորությունների ժամկետը 5 տարուց երկարացնել 7 տարի: Նախագահին խորհրդարանը ցրելու եւ պետության ղեկավարի արտահերթ ընտրություններ հայտարարելու լիազորություն է տրվում: Նշվում է, որ եթե Ադրբեջանի սահմանադրական դատարանը դրական եզրակացություն տա, փաստաթուղթը կդրվի հանրաքվեի:
