Ո՞ւր կհասցնի Հարկային օրենսգրքի անօրինական հետագիծը
Գործարար հանրության կրքերը թեժացրած Հարկային օրենսգրքի շուրջ քննարկումները կառավարությունում պարբերաբար շարունակվում են: Շահագրգիռ գերատեսչությունների ղեկավարներն ու ներկայացուցիչները խորհրդակցում են, թե ինչպե՞ս բացասական կտրուկ արձագանքը փոխել դրական ուղղությամբ: ՀՕ-ի շուրջ, առաջին ընթերցմամբ դրա ընդունումից հետո, քննարկումներ էին կազմակերպվել նախ խորհրդարանում, որոնք, սակայն, անորոշ ժամանակով դադարեցվեցին՝ հանդիպումների նախաձեռնող՝ ԱԺ Տնտեսական հարցերի մշտական հանձնաժողովի նախագահ Վարդան Այվազյանի գործուղման պատճառով: Սակայն այդ ընդմիջումն արդեն բավականին երկար տևեց, Այվազյանը, կարծես, արդեն պետք է վերադարձած լիներ գործուղումից, բայց քննարկումները չեն վերսկսվել: Եվ հայտնի չէ՝ ինչո՞ւ: Մեր բազմաթիվ զանգերը Վ.Այվազյանին՝ մնացին անպատասխան:
Սովորաբար, յուրաքանչյուր օրենսդրական փոփոխություն, նախքան կառավարության հաստատումը, ուղարկվում է բոլոր գերատեսչություններին՝ եզրակացություն ստանալու համար: Եվ այդ բոլորի կարծիքները կցված են լինում օրինագծին ու հասանելի կառավարության կայքում, ապա նաև՝ խորհրդարանի: Սակայն դրանցից ոչ մեկում Հարկային օրենսգրքի վերաբերյալ գերատեսչությունների գնահատականները մինչ օրս չեն հրապարակվել: Ավելին՝ լիազոր մարմինը՝ ՊԵԿ-ը, հրաժարվում է տրամադրել դրանք: Հարկային օրենսգրքի նախագծի վերաբերյալ ՀՀ գերատեսչությունների եզրակացությունները տրամադրելու մասին «168 Ժամի» հարցմանն ի պատասխան՝ ՀՀ ԿԱ ՊԵԿ տեղեկատվության և հասարակայնության հետ կապերի բաժնից ստացանք հետևյալ գրությունը.
«Հարկային օրենսգրքի նախագիծը մշակման տարբեր փուլերում բազմիցս քննարկվել է պետական կառավարման բոլոր շահագրգիռ մարմինների հետ, որոնք օրենսգրքի վերաբերյալ իրենց առաջարկները ներկայացրել են նախագծի մշակման աշխատանքային խմբին: Պետական կառավարման մարմինների գրությունները ներքին աշխատանքային, և միաժամանակ, ծավալուն փաստաթղթեր են: Հետևաբար՝ հայտնում ենք, որ, եթե հետաքրքրված եք հարկային օրենսգրքի նախագծին առնչվող կոնկրետ հարցով, ապա պատրաստակամ ենք տրամադրել այդ հարցի վերաբերյալ ինչպես՝ շահագրգիռ պետական կառավարման մարմինների, այնպես էլ՝ ՀՀ ԿԱ պետական եկամուտների կոմիտեի դիրքորոշումը»:
Միաժամանակ, ՊԵԿ-ից «խորհուրդ են տվել», որ ՀՕ նախագծի վերաբերյալ պետական կառավարման մարմինների առաջարկները ստանալու նպատակով կարող ենք դիմել նաև համապատասխան մարմնին:
Մեր տեղեկություններով՝ ՀՕ-ի վերաբերյալ գերատեսչությունների գնահատականներ պարզապես չկան: Դա է վկայում նաև այդ փաստաթղթերի որևէ հրապարակման բացակայությունը: Իսկ առանց համապատասխան եզրակացությունն ունենալու նախագծի ընդունումն ուղղակի օրենքի խախտում է: Առավել արժեքավոր կլիներ էկոնոմիկայի նախարարության եզրակացությունը: Դրա բացակայությունն ինքնին արդեն խոսուն է, պարզ է, որ Արծվիկ Մինասյանը չի ցանկացել ստորագրել իրականությունից հեռու եզրակացության տակ և իր վրա նման ծանր բեռ վերցնել, իսկ բազմաթիվ կետերով բացասական եզրակացությունն էլ ՊԵԿ-ը չէր ընդունի:
Կառավարությունում ՀՕ քննարկումներին միացել է նաև վարչապետի նորանշանակ խորհրդական Գագիկ Արզումանյանը, ով մեծ փորձառություն ունի բիզնեսում: Այժմ որոշ գործարարներ նրա հետ են կապում իրենց շահերի պաշտպանությունը և մեծ հույսեր են փայփայում, որ Հարկային օրենսգիրքը, ի վերջո, կփոփոխվի այնպես, որ գոնե չի վնասի տնտեսությանը:
