«Մեր հավաքականի ամենավատ խաղն էր, որը երբևէ տեսել եմ». Ռոբերտ Արզումանյան
Եվրո-2016-ի ընտրական փուլի Հայաստան Ալբանիա հանդիպումից հետո (0:3), ըստ armsport.am-ի՝ լրագրողների հետ իր կարծիքն է կիսել պաշտպան Ռոբերտ Արզումանյանը.
«Ոչինչ չկա ասելու, շատ վատ խաղ էր: Մեր հավաքականի ամենավատ խաղն էր, որը ես երբևէ տեսել եմ»:
– Ընդհանուր ընտրական փուլը շատ վատ ստացվեց մեր հավաքականի համար. ինչպե՞ս կմեկնաբանեք:
– Ի սկզբանե անհաջող ստացվեց: Մի քանի խաղում ինչ-որ բան չէր բավականացնում. հանդիպումների վերջնամասում բաց էինք թողնում հաղթանակը: Մասնակի հաջող խաղեր եղան՝ առաջին կեսում էինք լավ խաղում կամ երկրորդում: Չէինք կարողանում ամբողջ հանդիպումը լավ անցկացնել:
– Վերջին հաղթանակը պաշտոնական խաղերում հավաքականը տարել է 2 տարի առաջ: Այս տարներին ի՞նչը չի ստացվում:
– Այնժամ մեզ ուրիշ ձև էին վերաբերվում, մեր դեմ հիմա այլ կերպ են խաղում:
– Երևի արժանի էի, որ ինքագոլ գրանցվեց: Գոլերը մենք ինքներս բերեցինք: Շատ էինք գնդակ կորցնում, վտանագավոր հակագրոհներ էինք բաց թողնում:
– Մինչև ԱԱ-2018-ի ընտրական փուլի մեկնարկն ի՞նչ պետք է փոխել հավաքականում:
– Պետք է միասին լինենք: Այժմ վստահությունն է կորել մեր ուժերի հանդեպ: Մենք ունենք այնպիսի ֆուտբոլիստներ, որոնց հնարավորություններին շատ լավ ենք ծանոթ, սակայն տեսնում ենք, որ նրանց մոտ շատ հասարակ բաներ չեն ստացվում: Այսօր մենք վստահության պակաս ունեինք մեր ուժերի նկատմամբ:
– Որպես փորձառու պաշտպան՝ ինչպե՞ս կմեկնաբանեք պաշտպանության գծի անկազմակերպ խաղը:
– Հենց այդ մեկ բառով՝ անկազմակերպ: Ամբողջ թիմն է այդպես պաշտպանվում: Այս ընտական փուլում մենք խնդիր ունենք պաշտպանվելու հետ, այլ ոչ թե կոնկրետ տվյալ գծում:
– Ըստ Ձեզ՝ վստահության վերականգման համար ընկերական խաղեր անհրաժե՞շտ են:
– Ընկերական խաղեր կլինեն, սակայն չեմ կարող ասել, թե ինչքանով օգուտ կտան: Իրար հասկանալու խնդիր կա, որոնք կլրացնենք ստուգողական խաղերով:
– Ի՞նչ կասեք «Հաղթանակը սկսում է օրհներգից» պաստառի մասին:
– Ֆուտբոլիստներ կան, ովքեր երգում են օրհներգը, խաղացողներ կան՝ ոչ: Ես միշտ էլ երգել եմ ու երգում եմ: Հնարավոր է՝ ինչ-որ մեկը սնահավատ է, մեկ ուրիշը բառերը չգիտի, օրինակ՝ Գաել Անդոնյանը. ամեն դեպքում կարող եմ ասել, որ այդ հարցը մենք չենք քննարկել:
