«Մենք պետք է կարողանանք առավելագույնս ինտեգրվել բոլոր մակարդակներում»
ԱԺ պատգամավոր, Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանի ելույթն ԱԺ հայտարարությունների ժամին.
«Վերջին օրերին Հայաստանի հանրապետական կուսակցության երիտասարդական կազմակերպությունը հերթական շոշափելի արդյունքն է գրանցել եվրոպական քաղաքական դաշտում։ Կառույցը մոտ 40 երկրի 250 պատվիրակների կողմից միաձայն ընտրվել է Եվրոպայի ժողովրդական կուսակցության՝ ԵԺԿ-ի Երիտասարդական կազմակերպության անդամ։
Ասել, թե նման հեղինակավոր կառույցներին անդամակցելը հեշտ է, ճիշտ չէ։ Դրան նախորդում է տարիների հետևողական, դժվարին աշխատանք։ Եվ դա նշանակում է, որ մեր երիտասարդների գործը տեսանելի է, մենք կարողացել ենք խոսել իրենց լեզվով, մեր ծրագրերն ու գաղափարները մրցունակ ու տեսանելի են եվրոպական համայնքում։
Եվրոպական կազմակերպությունների հետ համագործակցության մեր շրջանակը շատ լայն է՝ «Կոնրադ Ադենաուեր» գերմանական հիմնադրամ, Բազմակուսակցական ժողովրդավարության Նիդերլանդների ինստիտուտ, Եվրոպայի ԴԵՄԻԿ կազմակերպություն և այլն։ Ավելին ասեմ, ՀՀԿ ԵԿ-ն ԴԵՄԻԿ-ում ներկայացված է փոխնախագահի պաշտոնով։ Ընդամենն օրեր առաջ Երևանում մեր կառույցը հյուրընկալել էր ԴԵՄԻԿ-ի խորհրդի հավաքը, որն անցավ բավականին արդյունավետ աշխատանքային մթնոլորտում, և որի կազմակերպումն ու անցկացումը տպավորվել էր մասնակիցների մոտ։
ԵԺԿ-ի Երիտասարդական կազմակերպության համագումարում Հայաստանն ունեցել է ևս մեկ նշանակալի ձեռքբերում. ընդունվել է Հայոց ցեղասպանությունը ճանաչող և դատապարտող բանաձև, որով կոչ է արվում Եվրամիության և Եվրախորհրդարանի անդամ երկրներին ապրիլի 24-ը սահմանել որպես Հայոց ցեղասպանության զոհերի հիշատակի օր։
Առաջիկայում ՀՀԿ Երիտասարդական կազմակերպությունը նախատեսում է հաղթահարել ևս մեկ հանգրվան. անդամակցել «Եվրոպայի դեմոկրատ ուսանողներ» կազմակերպությանը՝ EDS-ին, որն արդեն նոր հարթակ է տարբեր քաղաքական ուժեր ներկայացնող ուսանողների համար։
Անդամակցությունը նման կառույցներին մեծ նվաճում է ոչ միայն կուսակցական երիտասարդների, այլև Հայաստանի համար, քանի որ մինչև մեզ ճանաչելն ու մեզ հետ համագործակցելը միջազգային կառույցները տարածաշրջանային շփումներն իրականացնում էին ադրբեջանական և թուրքական կառույցների միջոցով՝ լսելով միակողմանի մեկնաբանություններ։
Համագործակցումը և՛ եվրոպական, և՛ եվրասիական կառույցների հետ այլընտրանք չունի։ Մենք պետք է կարողանանք առավելագույնս ինտեգրվել բոլոր մակարդակներում և բոլոր այդ հարթակներն օգտագործել ի շահ մեր երկրի, ի շահ մեր երիտասարդների։ Նման անդամակցությունները միջոցներ են մեր ձայնն աշխարհին ավելի լսելի ու ազդեցիկ դարձնելու համար»։
