Նյարդերը հանգստացնող մթերքներ
Նյարդային անհանգիստ վիճակը շատ հաճախ գիրացման պատճառ է դառնում: Առաջարկվող մթերքները և սննդակարգը մեծապես կնպաստեն ձեր առողջության պահպանմանը։ Կարդալով այս նյութը` դուք ավելի լավ կպատկերացնեք մթերքներում պարունակվող որոշ օգտակար նյութերի ազդեցության մեխանիզմը։
1. Նուշ։ Հարուստ է մագնիումով, կալցիումով, կալիումով և B2 վիտամինով, որոնք նպաստում են «տրամադրություն ստեղծող» սերոտոնինի գոյացմանը։ Ցինկը բարձրացնում է հյուսվածքների զգայունությունն ինսուլինի հանդեպ, ունի հակասթրեսային հատկություն։ E վիտամինը պաշտպանում է օրգանիզմի բջիջները։
- Կերեք 5-10 հատ` ետճաշիկին։
- Նուշի էներգետիկ արժեքը բարձր է, սակայն պարունակվող ճարպերն օգտակար են։
- Նուշի մեջ բարենպաստ է մագնիումի, կալցիումի փոխհարաբերությունը։
2. Բրոկկոլի կաղամբ։ Հարուստ է B խմբի վիտամիններով, որոնցից ֆոլիաթթուն կանխարգելում է տագնապի և դեպրեսիայի զարգացումը։
3. Հապալաս սև։ Պարունակում է մեծ թվով օրգանիզմի բջիջները պաշտպանող հակաօքսիդանտ նյութեր և C վիտամին։ Հոգնածության, սթրեսի, հոգեկան ընկճվածության դեպքում C վիտամինի պարունակությունն օրգանիզմում զգալիորեն նվազում է։ Հապալաս սևը սրում է տեսողությունը և հանգստացնում է աչքերը, կարգավորում է շաքարի պարունակությունը։
4. Բրինձ և այլ հատիկավոր բույսեր։ Ամբողջական հատիկներից պատրաստված սննդամթերքը հարուստ է դանդաղ յուրացվող ածխաջրերով, որոնցից անջատվող գլյուկոզան աստիճանաբար է ներթափանցում արյան մեջ։ Ուղեղը յուրացնում է գլյուկոզան՝ առանց ինսուլինի միջամտության, և դրա սակավության դեպքում տագնապի ազդանշան է ուղարկում, որի հետևանքով առաջանում են ֆիզիոլոգիական բնույթի խնդիրներ։
- Պարզ ածխաջրեր պարունակող մթերքը, օրինակ` շաքարը, սովորական հացն առաջացնում են արյան մեջ պարունակվող գլյուկոզայի մակարդակի կարճաժամկետ` իմպուլսիվ տատանումներ և սթրեսային վիճակ։
5. Տավարի անյուղ միս։ Հարուստ է օրգանիզմում լավ յուրացվող գեմային երկաթով, ցինկով, B խմբի վիտամիններով, տրիպտոֆան ամինաթթվով։ Առանց տրիպտոֆանի ուղեղում չի կարող գոյանալ սերոտոնինը` «երջանկության» հորմոնը։
- Կարևոր է իմանալ, որ ուղեղի համապատասխան հատվածից սերոտոնինի գոյացման վերաբերյալ հրահանգը տրվում է կեսօրից հետո։
Ճարպերը և հատկապես ստամոքսահյութի բարձր թթվայնությունը նվազեցնում են տրիպտոֆանի պարունակությունն արյան մեջ։ Ցանկալի է մսեղենը պատրաստել գոլորշու կամ գրիլի վրա, առանց այլ յուղեր օգտագործելու։
6. Ձկնեղեն. Հարուստ է B խմբի վիտամիններով, հատկապես B6 և B12։ B6 վիտամինը մասնակցում է սերոտոնինի գոյացման գործընթացին։ Ձկնեղենը, ինչպես նաև թռչնամիսը, պարունակում են տրիպտոֆան ամինաթթու։ B12 վիտամինի սակավությունը հանգեցնում է դեպրեսիայի` ընկճվածության զարգացմանը։
7. Կաթ, կաթնաշոռ, պանիր։ Պարունակում են տրիպտոֆան, B2 և B12 վիտամիններ, հակաօքսիդանտ նյութեր։ Գերադասելի է ցածր յուղայնության կաթնամթերքը։ Պանիրը հարուստ է սելենով, առանց այդ միկրոտարրի անհնարին է կենդանական բջիջի գոյը, ցանկալի է ուտել համեմի, կանաչու կամ սերմի հետ։ (Տե՛ս Ջ. Սահակյան, «Մոգական բուժարարներ թ.4» գրքույկ, Երևան, 2014թ. և «168 Ժամ», 01.05 և 06.05. 2014թ.)։
- Կաթնաշոռ. Հարուստ է B6 վիտամինով, ցանկալի է ուտել նախաճաշին` թարմ աղացած վուշի սերմի կամ դրա յուղի հետ (Տե՛ս «168 Ժամ», 02.11.2013թ. և 22.11.2013թ.)։
8. Քունջութ, հատիկավոր լոբի, ոլոռ, թուզ, փյունիկյան խուրմա։ Պարունակում են տրիպտոֆան։
9. Ծովակաղամբ, այլ ծովամթերք։ Հարուստ է պանտոտենաթթվով, նույնն է` B5 վիտամինով։
Ունի հակասթրեսային հատկություն, կանխարգելում է գիրացումը։
- Զգալի քանակությամբ պարունակվում է նարնջի, բանանի, արևածաղկի սերմի, մսեղենի, ոսպի մեջ և այլ մթերքներում։
Հ.Գ. Լույս են տեսել հեղինակի «Մոգական բուժարարներ» մատենաշարի թվով 4 գրքույկները: Հիշեցնենք, որ վաճառքում է նաև հեղինակի «Պահապան ծառերի բուժիչ զորությունը» գիրքը: Հեղինակի բոլոր գրքերը կարող եք ձեռք բերել «Նոյյան տապան», «Բուկինիստ», «Նոր գիրք» և «Արտ Բրիջ» (Աբովյան 20) գրախանութներից:
