Ի՞նչ անհրաժեշտություն կա հրավիրելու ՀԱԿ-ին, եթե այդ ուժն ամեն օր հայտարարում է, որ ցանկություն չունի ինձ հետ հանդիպելու. Սերժ Սարգսյան
«Կամա թե ակամա, ՀԱԿ-ը մասնակցելու է սահմանադրական բարեփոխումների վերաբերյալ քննարկումներին»,- այս մասին այսօր «Արարատի ստորոտին» միջազգային մեդիա ֆորումի ընթացքում ասաց ՀՀ նախագահ Սերժ Սարգսյանը՝ անդրադառնալով սահմանադրական բարեփոխումների վերաբերյալ քննարկումներին և հարցին, թե ինչու ՀԱԿ-ը չի հրավիրվել դրանց: «Ես որևէ քաղաքական ուժի չեմ թերագնահատում: Ես զարմանում եմ, որ տեղեկատվությունը Ձեզ հասանելի չէ: Ես չեմ խոսել Սահմանադրության տեքստի մասին, տեքստը գոյություն չունի, ես խոսել եմ հայեցակարգին հավանություն տալու մասին, և չի եղել մեկ կուսակցություն, որն ասել է՝ պետք չէ հավանություն տալ, որովհետև հավանությունը դեռ չի նշանակում, որ վերջնական որոշում է կայացվել բարեփոխումների տեքստի վերաբերյալ»,- ասաց նա՝ շարունակելով, որ վերջնական որոշումը ժողովրդինն է, ինքը ևս դեռևս վերջնական համոզվածություն չունի դրա վերաբերյալ:
Ինչ վերաբերում է ՀԱԿ-ին՝ Սերժ Սարգսյանն ասաց. «Եթե մի կուսակցություն ամեն օր, որպեսզի չմոռանա, հայտարարում է, որ ցանկություն չունի ինձ հետ հանդիպելու՝ այդ թեման քննարկելու, ի՞նչ անհրաժեշտություն կա հրավիրելու, և ինչի՞ դա կարող է բերել»: Նա ասաց, որ բոլոր ուժերին հրավիրել է, պնդել, որ մեծ հաճույքով այդ հնարավորությունը կընձեռի բոլորին, թեև որոշ քաղաքական ուժերի անձնապես հրավեր է հղել՝ ընդգծելու այդ ուժի կարևորությունը: Իսկ եթե, Սարգսյանի խոսքով, ուժը կրկնում է ցանկության բացակայության մասին, ապա չարժե պարտադրել: ՀՀ նախագահի համոզմամբ՝ կամա թե ակամա, ՀԱԿ-ը մասնակցելու է այդ քննարկումներին: «Հո բոլորը չե՞ն կարող կողմ լինել»,- ասաց Սարգսյանը:
