Պորոշենկոն իր ցավակցություններն է հղել Ուկրաինայի հայ համայնքի հոգևոր առաջնորդի մահվան կապակցությամբ
Ուկրաինական UNIAN լրատվական գործակալության փոխանցմամբ՝ Ուկրաինայի նախագահ Պյոտր Պորոշենկոն իր ցավակցություններն է հղել Հայ առաքելական եկեղեցու ուկրաինական թեմին՝ կապված նրա առաջնորդ, արքեպիսկոպոս Գրիգորիս Բունիաթյանի մահվան հետ: Այս մասին հայտնել է Ուկրաինայի նախագահի մամլո ծառայությունը.
«Խորին վշտով ընդունեցի արքեպիսկոպոս Գրիգորիս Բունիաթյանի մահվան մասին տեղեկությունը: Կյանքից հեռացավ եկեղեցական կարկառուն գործիչ, Ուկրաինայի հայ համայնքի հոգևոր առաջնորդը:
Նա շատ ջանքեր է գործադրել պետություն-եկեղեցի փոխհարաբերությունների զարգացման ու միջդավանաբանական կառուցողական երկխոսության հաստատման համար: Մեր սրտերում մշտապես վառ հիշողություններ կմնան նրա մասին: Աստված հոգին լուսավորի»:
Գրիգորիս Բունիաթյանը 69 տարեկան հասակում Խարկովում մահացել է մարտի 7-ին:
