«Նախևառաջ պետք է ապացուցվի, որ իրապես Պերմյակովը եղել է այն հանցագործը, որին արդեն առաջադրել են մեղադրանքը»
«Ասպարեզ»-ը զրուցել է «Ընդդեմ իրավական կամայականությունների» ՀԿ-ի նախագահ, ՀՀ մարդու իրավունքների նախկին պաշտպան Լարիսա Ալավերդյանի հետ:
-Տիկին Ալավերդյան, ՀՀ գլխավոր դատախազ Գեւորգ Կոստանյանը նախօրեին հայտարարել էր, թե դեռեւս բավարար հիմքեր չկան՝ ՌԴ դատախազին դիմելու համար: Դուք ի՞նչ եք կարծում, արդյո՞ք հիմքեր չկան:
-Կարծում եմ՝ արդեն իսկ քայլ առաջ է տեղի ունեցել գոնե միասնական շտաբ ստեղծելու առումով, որովհետեւ դա պետք է արվեր առաջին իսկ օրը: Հիմա ստացվում է, որ այդ շտաբը միայն հետաքննություն է իրականացնում, այլ ոչ թե լուծում է այն հարցը, որը բարձրացված է, թե որ մի երկրի իրավասության, որ մի երկրի դատարանի, որ մի երկրի ազատազրկման վայրի մասին է խոսքը:
Ես համոզված եմ, որ նախեւառաջ կամ հիմա պետք է տրվեն այդ հարցերի պատասխանները՝ այն 2 միջազգային պայմանագրերի ներքո, որոնցից մեկը «Ռազմաբազայի տեղավորման մասին» է, մյուսը համաձայնագիրն է: Ես համոզված եմ, որ այդ երկու համաձայնագրերով, ինչպես նաեւ այլ միջազգային ու միջպետական հարաբերությունները կարգավորող պայմանագրերի ներքո, պետք է այդ հարցերի պատասխանը տրվի, որովհետեւ հանրությունն այդ հարցերի պատասխանին է սպասում: Եթե հիմա Կոստանյանն ասում է, որ դեռեւս հիմքեր չկան, նշանակում է, որ այս հարցերը մի կողմ են դրված:
-Տիկին Ալավերդյան, հանրությունն իր բողոքն հիմա ո՞ւմ պիտի ուղղի՝ Հայաստանի իշխանությունների՞ն, թե՞ ռուսական կողմին:
-Միայն Հայաստանի իշխանություններին…ես անընդհատ դա ընդգծում եմ՝ մենք ինքնուրույն երկիր ենք, մենք պահանջատեր ենք Հայաստանի իշխանությունների նկատմամբ եւ համոզված եմ, որ Հայաստանի իշխանությունները պետք է բարձրացնեն այդ հարցերը, ստանան դրանց պատասխանները եւ ներկայացնեն հանրությանը:
-Չնայած այս թեման շատ է արծարծվել, որ Պերմյակովը պետք է դատվի ՀՀ-ում ու ՀՀ օրենքներով, ամեն դեպքում, ո՞րն է Ձեր տեսակետն այս հարցում:
-Ես ունեմ անձնական մոտեցում, որը հետեւյալն է. նախեւառաջ պետք է ապացուցվի, որ տեղի է ունեցել դասալքություն եւ, իրապես, Պերմյակովը եղել է այն հանցագործը, որին արդեն առաջադրել են մեղադրանքը: Քանի որ հիմա դա միակ վարկածն է, ես կարծում եմ, այսպես թե այնպես, այն ապացուցվելու է: Կներեք, իհարկե, ցինիզմի համար, որովհետեւ ես ի սկզբանե համոզված եմ եղել, որ մեկ վարկածով չէ որ պետք է սահմանափակվի այդ խճճված ու բարդ հանցագործությունը:
Բարդ եմ ասում, որովհետեւ բացի Պերմյակովի ինքնախոստովանական ցուցմունքից, որեւէ այլ ապացույց չի ներկայացվել, որ ինքը գնացել, անձամբ դա արել է: Ճիշտ է ասել գլխավոր դատախազը, որ հիմա գնում է քննությունը եւ քնության արդյունքում կլինեն մատնահետքեր կամ այլ ապացույցներ, նոր այլ քայլերի կդիմեն:
Երկրորդ. ես կարծում եմ, որ ոչ թե հանցագործությունների հերթականությունը պետք է չափանիշ, հիմք լինի, թե խնդիրը որտեղ լուծել, այլ հանցագործության ծանրությունը: Դա իմ անձնական մոտեցումն է, որ երկու տիպի հանցագործություններից ընտանիքի ոչնչացումը, անմեղ երեխաներին սպանելը նախեւառաջ պետք է չափանիշ ընդունվի:
-Գյումրիում այս դեպքից հետո գյումրեցիներն իրենց արդեն անապահով ու չպաշտպանված են զգում: Տիկին Ալավերդյան, ո՞վ պիտի տա այդ ապահովության երաշխիքներն ու ինչպե՞ս:
-Դա նրանից է, որ այս օրերին մենք խոսել ենք ամեն ինչի մասին, բացի մեկ բանից՝ ռուսական սպայական կազմին պատասխանատվության ենթարկելու մասին: Մինչ այժմ չի հնչեցվել՝ արդյոք ռազմաբազայում ներքին ծառայողական հետաքննություն է գնում, կան արդյո՞ք այնտեղ հանցագործության հատկանիշներ, եթե եղել է դասալքություն, սպայական կազմից ո՞վ է պատասխանատվություն կրելու: Այսինքն՝ ստացվում է, որ բերել, սլաքը կանգնեցրել են միայն Պերմյակովի վրա, դրա համար գյումրեցիների մոտ անապահովության զգացումն է:
Հոդվածն ամբողջությամբ՝ սկզբնաղբյուր կայքում:
