Չավուշօղլուն ու Մամեդյարովը քննարկել են «Բաքու-Թբիլիսի-Կարս» երկաթգծի հարցը
Ադրբեջանական APA լրատվական գործակալության փոխանցմամբ՝ Կարսում տեղի է ունեցել Թուրքիայի ու Ադրբեջանի արտգործնախարարներ Մևլյութ Չավուշօղլուի ու Էլմար Մամեդյարովի երկկողմ հանդիպումը: Հանդիպումը կայացել է Թուրքիայի, Վրաստանի ու Ադրբեջանի արտգործնախարարների եռակողմ հանդիպման շրջանակներում:
Այս մասին հայտնել է Ադրբեջանի ԱԳՆ-ի մամլո ծառայությունը: Հանդիպման ժամանակ կողմերը գոհունակություն են հայտնել Թուրքիայի ու Ադրբեջանի միջև ռազմավարական կապերի զարգացման մակարդակի կապակցությամբ: Ընդգծվել է, որ եռակողմ հանդիպումն իր ներդրումը կունենա տարածաշրջանային համագործակցության ու կայունության մեջ:
Չավուշօղլուն ու Մամեդյարովն ընդգծել են «Անդրանատոլիական» գազատարի ու «Բաքու-Թբիլիսի-Կարս» երկաթուղու կարևորությունը: Հանդիպման ժամանակ քննարկվել են նաև տարածաշրջանային ու միջազգային այլ հարցեր:
