Իրանի նոր ԱԹՍ-ի թռիչքի հեռավորությունը կազմում է 3000 կիլոմետր
Ռուսական РИА Новости լրատվական գործակալության փոխանցմամբ` իրանցի զինվորականներն ունեն այնպիսի անօդաչու թռչող սարքեր (ԱԹՍ), որոնց թռիչքի հեռահարությունը կազմում է 3000 կիլոմետր: Այս մասին հայտարարել է Իսլամական հեղափոխության պահակազորի գլխավոր հրամանատարի օգնական Հուսեին Սալյամին:
Սալյամին, Թեհրանում ելույթ ունենալով պրոֆեսորների առջև, հայտարարել է, որ այդ ԱԹՍ-երին չեն կարող հայտնաբերել հակառակորդի ռադարները, ինչպես նաև դրանք հարմարեցված են նկարած պատկերների օպերատիվ փոխանցման համար: Իրանցի զինվորականն ընդգծել է, որ ԱԹՍ-երը մշակվել են առանց օտար երկրների օգնության:
Սալյամին մանրամասնել է, որ եթե մի քանի տարի առաջ իրենք կարող էին միայն երազել նման ԱԹՍ-երի մասին, ապա այսօր դա դարձել է իրականություն:
