Ռուսաստանը պատասխան միջոցներ է պատրաստում ԵՄ-ի ու Ուկրաինայի ասոցացմանը
Ռուսական РИА Новости լրատվական գործակալության փոխանցմամբ՝ Ռուսաստանը նոյեմբերի 1-ից մաքսատուրքեր կսահմանի Ուկրաինայից ապրանքների ներկրման նկատմամբ և կխստացնի ուկրաինական ապրանքների մաքսային վարչարարությունն ու սանիտարային վերահսկողությունը, եթե մինչ այդ ամբողջովին գործարկվի ԵՄ-ի ու Ուկրաինայի միջև ստորագրված Ասոցացման համաձայնագիրը:
Այս մասին այսօր հայտարարել է Ռուսաստանի տնտեսական զարգացման նախարարության ղեկավար Ալեքսեյ Ուլյուկաևը: Նա ընդգծել է, որ իրենք ամբողջովին պատրաստ են փոխզիջումներ փնտրելուն և ցանկանում են գտնել այս ոչ պարզ իրավիճակից դուրս գալու պատասխանները.
«Սա վերջին հնարավորությունն է: Եթե մեզ չլսեն մեր գործընկերները, համոզիչ չհամարեն մեր փաստարկները, ապա մենք կձեռնարկենք համարժեք պաշտպանիչ միջոցներ: Եթե սեպտեմբերի 17-18-ին տեղի ունենա մեզ մոտ մտահոգություն հարուցող բոլոր դիրքերով հանդերձ համաձայնագրի վավերացում, ապա այս տարվա նոյեմբերի 1-ից այն կմտնի ուժի մեջ, և մենք այդ օրվանից կսահմանենք պաշտպանիչ միջոցներ»:
