Թուրքիան որոշել է միայն պասսիվ աջակցություն ցուցաբերել «Իսլամական պետության» դեմ պայքարին
Թուրքական Dünya Bülteni լրատվական կենտրոնի փոխանցմամբ՝ Թուրքիայում բարձրաստիճան զինվորականների ու պաշտոնյաների մասնակցությամբ անցկացվել է անվտանգության հարցերով գագաթաժողով, որը նախագահել է երկրի վարչապետ Ահմեթ Դավութօղլուն: Այն տևել է մոտ երեք ժամ:
Գագաթաժողովում քննարկվել է Իրաքում ու Սիրիայում «Իսլամական պետություն» խմբավորման դեմ պայքարում կոալիցիա ձևավորելու և մասշտաբային գործողություն սկսելու մասին ԱՄՆ նախագահ Բարաք Օբամայի առաջարկը:
«Իսլամական պետության» զինյալներին օդից պետք է հարվածի ԱՄՆ-ի օդուժը, իսկ ցամաքից՝ Իրաքի բանակը, Փեշմերգայի ուժերը (քրդեր) և սիրիական չափավոր ընդդիմության ուժերը: Ակնկալվում էր, որ այդ ամենի հետ մեկտեղ ռազմական էական դեր պետք է խաղար նաև Իրաքին ու Սիրիային սահմանակից Թուրքիան:
Սակայն Թուրքիայում անցկացված անվտանագության գագաթաժողովի արդյունքներով որոշվել է հեռու մնալ «Իսլամական պետություն» խմբավորման դեմ կոալիցիայի մեջ մետնելուց, չաջակցել խմբավորման դեմ ցամաքային գործողությանը և փոխարենը նրան ցուցաբերել միայն պասսիվ աջակցություն: Որպես դրա պատճառաբանություն՝ նշվել է զինյալների մոտ պատանդ պահվող թուրք 49 դիվանագետները:
