Կենսաթոշակը հաջորդ տարվա հունվարի 1–ից կբարձրանա միջինը 15%–ով
Ինչպես այսօր լրագրողների հետ հանդիպման ժամանակ տեղեկացրել է Սոցիալական ապահովության պետական ծառայության պետի առաջին տեղակալ Սմբատ Սաիյանը, Հայաստանում կենսաթոշակների չափը 2015 թվականի հունվարի 1-ից կբարձրանա միջինը 15 տոկոսով:
Նա հատուկ ուշադրություն է հրավիրել այն հանգամանքի վրա, որ խոսքը վերաբերում է միջին ցուցանիշին. ոմանց մոտ բարձրացումը կլինի ավելի զգալի, ոմանց մոտ՝ ավելի քիչ չափով։ «Կբարձրացվեն նախևառաջ ամենացածր կենսաթոշակները։ Այսօր խնդիրը ոչ թե կենսաթոշակների ինդեքսավորումն է, այլ նվազագույն կենսաթոշակները ապրուստի համար նվազագույն չափի հասցնելն ու թոշակառուների շրջանում աղքատության վերացումը»,– ասել է Սաիյանը՝ ավելացնելով, որ այսօր մոտ 13 հազար հայ կենսաթոշակառուներ Հայաստանում ապրում են ծայրահեղ աղքատության վիճակում և ստանում ամսական 22 հազար դրամից ցածր կենսաթոշակ։
