Ուկրաինացի զինվորականները որոշել են ոչ թե գրոհել, այլ՝ շրջափակել Դոնեցկն ու Լուգանսկը
ZN.UA-ի փոխանցմամբ՝ հակաահաբեկչական գործողության ուժերը չեն պատրաստվում ուղիղ գրոհ ձեռնարկել Լուգանսկի ու Դոնեցկի դեմ, փոխարենը նրանք պատրաստվում են շրջափակել դրանք: Հենց դրանում է կայանում ուկրաինական բանակի ռազմավարական գլխավոր պլանը:
Այս մասին հայտարարել է Ազգային անվտանգության ու պաշտպանութան խորհրդի փոխքարտուղար Միխայիլ Կովալը: Նա մանրամասնել է, որ այդ պլանը հաստատվել է երկրի նախագահ, գերագույն գլխավոր հրամանատար Պյոտր Պորոշենկոյի կողմից:
Կովալն ընդգծել է, որ պլանի համաձայն, իրականացվելու է տվյալ բնակավայրերի լիակատար շրջափակում, ինչը զինյալներին կհարկադրի վայր դնել իրենց զենքը:
Սրանից առաջ հաղորդվել էր, թե ուկրաինացի զինվորականները հրետանային ու ավիացիոն հարվածներ են հասցնելու Դոնեցկին ու Լուգանսկին: Սակայն ուկրաինացի զինվորականները բացառում են բնակավայրերի զանգվածային ռմբակոծությունը:
