Շևարդնաձեն միջազգային նշանակության քաղաքական գործիչ էր. Մարգվելաշվիլի և Գարիբաշվիլի
Վրացական IPN լրատվական գործակալության փոխանցմամբ՝ Վրաստանի նախագահ Գեորգի Մարգվելաշվիլին ու վարչապետ Իրակլի Գարիբաշվիլին իրենց ցավակցություններն են հայտնել երկրի նախկին նախագահ Էդուարդ Շևարդնաձեի մահվան կապակցությամբ:
Մարգվելաշվիլիի խոսքերով՝ Շևարդնաձեն հանդիսացել է 20-րդ դարի առաջադեմ քաղաքական գործիչներից մեկը, ով մասնակցել է խորհրդային համակարգի ապամոնտաժմանը:
Մարգվելաշվիլու խոսքերով՝ Շևարդնաձեն այնպիսի քաղաքական գործիչ էր, որի անվան հետ կապված էր Եվրոպայում պատերի փլուզումն ու նոր Եվրոպայի կառուցումը: Մարգվելաշվիլին կարծում է, որ Շևարդնաձեն մեծ դեր է խաղացել նաև նոր Վրաստանի ստեղծման և արևմտյան կուրսի զարգացման մեջ:
Գարիբաշվիլին իր հերթին հայտարարել է, որ Շևարդնաձեն կարևոր ներդրում է ունեցել ժամանակակից աշխարհում Վրաստանի աշխարհաքաղաքական դերակատարության ձևավորման մեջ: Գարիբաշվիլին ընդգծել է, որ Շևարդնաձեն եղել է միջազգային նշանակության քաղաքական գործիչ, ով մեծ ներդրում է ունեցել «Սառը պատերազմի» ավարտում և նոր աշխարհակարգի հաստատման մեջ:
