Պուտինը ստորագրել է Հայաստանի հետ միջկառավարական համաձայնագրի վավերացման մասին օրենքը
Ռուսական РИА Новости լրատվական գործակալության փոխանցմամբ՝ Ռուսաստանի նախագահ Վլադիմիր Պուտինը ստորագրել է Հայաստանի հետ միջկառավարական համաձայնագրի վավերացման մասին օրենքը, որն առնչվում է Հայաստանին բնական գազ, նավթամթերք և չմշակված բնական ալմաստներ մատակարարելուն:
Փաստաթուղթը հրապարակվել է իրավական տեղեկատվության պորտալում: Համաձայնագիրը ստորագրվել է 2013 թվականի դեկտեմբերի 2-ին, Երևանում և նախատեսում է կազմակերպել Ռուսաստանից այդ ապրանքատեսակների մատակարարում՝ առանց մաքսատուրքերի, նախքան եվրասիական ինտեգրման տիրույթին Հայաստանի միանալը:
Դրա հետ մեկտեղ արգելվում է Հայաստան առանց մաքսատուրքերի Ռուսաստանի մատակարարած այդ ապրանքների վերաարտահանումը երրորդ երկրներ:
