Պորոշենկոն հեռախոսազրույց է ունեցել Հերման վան Ռոմպեյի հետ
ZN.UA-ի փոխանցմամբ՝ Ուկրաինայի նախագահ Պյոտր Պորոշենկոն հեռախոսազրույց է ունեցել Եվրոպական խորհրդի նախագահ Հերման վան Ռոմպեյի հետ: Այս մասին հայտնել է Ուկրաինայի նախագահի մամլո ծառայությունը:
Հեռախոսազրույցի ժամանակ Պորոշենկոն հայտարարել է, որ Ուկրաինան, ԵՄ-ն ու Ռուսաստանը կարող են մինչև հունիսի 27-ը փորձագետների մակարդակով եռակողմ խորհրդակցություններ անցկացնել արևելքում տիրող իրավիճակի և մասնավորապես դրա կարգավորման վերաբերյալ իր խաղաղության պլանի շուրջ:
Ուկրաինայի նախագահն ընդգծել է, որ հավատում է, որ Ռուսաստանը խաղաղության պլանին աջակցելու է ոչ միայն խոսքերով, այլև՝ գործով: Ռոմպեյն իր հերթին բարձր է գնահատել Պորոշենկոյի խաղաղության պլանը՝ ընդգծելով, որ դրան աջակցում են ոչ միայն ԵՄ-ի անդամ երկրները, այլև՝ համայն աշխարհը:
Ռոմպեյը մտահոգություն է հայտնել Ուկրաինայի արևելքում տիրող իրավիճակի մասին և հայտարարել է Ռուսաստանի դեմ հավելյալ պատժամիջոցներ սահմանելու հնարավորության մասին, եթե չգործադրվեն բոլոր ջանքերը՝ խաղաղություն հաստատելու համար:
