Իրանն ու ՌԴ-ը սկզբունքային համաձայնության են եկել երկու նոր ատոմակայանի կառուցման շուրջ
Ռուսական ИТАР-ТАСС լրատվական գործակալության փոխանցմամբ՝ Իրանն ու Ռուսաստանը սկզբունքային համաձայնության են եկել երկու նոր ատոմակայանի կառուցման շուրջ: Այս մասին հայտարարել է Իրանի Ատոմային էներգիայի կազմակերպության պաշտոնական ներկայացուցիչ Բեհրուզ Քամալվանդին:
Նա հավելել է, որ կողմերը պլանավորում են տվյալ հարցի շուրջ վերջնական համաձայնության հասնել երկուշաբթի-երեքշաբթի: Այսօր Թեհրան է ժամանել «Ռոսատոմ» կորպորացիայի գլխավոր տնօրենի տեղակալ Նիկոլայ Սպասկին:
Երկօրյա իրանական այցի շրջանակներում Սպասկին հանդիպումներ է ունենալու Իրանի Ատոմային էներգիայի կազմակերպության ղեկավար Ալի Աքբար Սալեհիի, Բեհրուզ Քամալվանդիի, Իրանի արտգործնախարարի՝ իրավական ումիջազգային հարցերով տեղակալ Աբբաս Արաղչիի հետ:
Ռուսաստանն Իրանի տարածքում կառուցել է Բուշեհրի ատոմակայանը, ինչը հանդիսացավ Մերձավոր Արևելքի առաջին ատոմակայանը: 2011 թվականի սեպտեմբերին Բուշեհրի ատոմակայանը միացվեց Իրանի էներգոհամակարգին և հասցվեց իր 100 տոկոսանոց հզորությանը:
