Խեղդամահ արված կնոջ երեխաները մարտից բնակվում են Սոչիում
tesankyun.am-ը գրում է. Հունիսի 17-ին Տավուշի մարզի առաջին ատյանի դատարանի Իջեւանի նստավայրում մեկնարկել է Տավուշ գյուղի բնակիչ 1986թ. ծնված Հովսեփ Իսրայելյանի դատավարությունը:
Նա մեղադրվում է այն բանի համար, որ 2014թ. հունվարի 13-ին, ժամը 07.00-ի սահմաններում Տավուշ գյուղում գտնվող իր տան ննջասենյակում, այլ տղամարդկանց հետ իրեն դավաճանելու թեմայի շուրջ վիճաբանության մեջ է մտել իր կնոջ՝ Հասմիկ Զաքինյանի հետ, որի ընթացքում ննջասենյակի մահճակալի վրա, երկու ձեռքերով պարանոցի շրջանում սեղմելով, շնչահեղձ անելու միջոցով սպանել է նրան:
Հ. Իսրայելյանին մեղադրանք է առաջադրվել ՀՀ քրեական օրենսգրքի 104 հոդվածի 1-ին մասով(«Սպանություն»): Նրան այդ հոդվածով սպառնում է 8-15 տարի ազատազրկում: Հ. Իսրայելյանը պայմանագրային զինծառայող էր:
Ըստ «Դատալեքս» կայքի՝ քրեական գործով իրեղեն ապացույց են ճանաչվել ձեռքերի մատների եղունգների կտրվածքները եւ դրանց տակ առկա պարունակությունները: Նախկինում մենք տեղեկացրել ենք, Հ. Իսրայելյանի եւ Հ. Զաքինյանի երկու երեխաները որ հավանաբար կտեղափոխվեն Սոչի:
Տավուշի գյուղապետ Արթուր Հովհաննիսյանից տեղեկացանք, որ Հովսեփ Իսրայելյանի հայրը՝ Բորիկ Իսրայելյանը այս տարվա մարտին դառնալով իր երկու թոռների՝ 2007թ. ծնված աղջկա եւ 2009թ. ծնված տղայի խնամակալը, նրանց տեղափոխել է իր տուն՝ Ռուսաստանի Սոչի քաղաք: Գյուղապետի վկայությամբ՝ այդ երեխաները հաշվառված են մնում Տավուշ համայնքում: Բորիկ Իսրայելյանի կինը՝ Հովսեփի մայրը տարիներ առաջ մահացել է,որից հետո Բ. Իսրայելյանը երկրորդ անգամ, իր համերկրացու հետ ամուսնանալով՝ բնակություն է հաստատել Սոչիում:
