Իրաքյան բանակը զինյալներից ազատագրել է Տիկրիտ քաղաքը
Լիբանանյան Al Manar հեռուստաալիքի փոխանցմամբ՝ իրաքյան զորքերին հաջողվել է զինյալներին դուրս մղել Բաղդադից 140 կիլոմետր դեպի հյուսիս-արևմուտք ընկած Տիկրիտ քաղաքից:
Սալահ ադ Դին նահանգում իրականացված այդ գործողության հրամանատար, գեներալ Ալի ալ-Ֆրեյջին հայտարարել է, որ իրաքյան բանակի էլիտար զորամասերն ամբողջովին վերահսկում են Տիգրիս գետի ափին ընկած այդ քաղաքը և հետապնդում են «Լևանտում ու Իրաքում իսլամական պետություն» խմբավորման զինյալներին:
Նշվում է, որ իրաքյան կողմը Սիրիային սահմանակից Անբար նահանգից զորքեր է փոխադրում Իրաքի հյուսիս-արմուտք: Իրաքի ռազմական հրամանատարությունը, ամենայն հավանականությամբ, պատրաստում է Մոսուլը զինյալներից ազատագրելու հատուկ գործողություն:
Իրաքի խորհրդարանի նիստում պետք է քննարկվի երկրում արտակարգ դրություն մտցնելու մասին վարչապետ Նուրի ալ-Մալիքիի առաջարկը՝ կապված Մոսուլի դեպքերի հետ: Մոսուլում բնակվում է 1.8 միլիոն մարդ, նրա հարյուր հազարավոր բնակիչներ մեկնել են Էրբիլ՝ քրդական ինքնավարության կենտրոն:
