Գվելեթի-Դարիալ (Ներքին Լարս) ավտոճանապարհն ակնկալվում է բացել հունիսի 14-15-ը
ՀՀ տրանսպորտի և կապի նախարարությունը Վրաստանի ճանապարհների շինարարության դեպարտամենտից մշտապես ստանում է տեղեկատվություն Վրաստանի տարածքում` Գվելեթի-Դարիալ (Ներքին Լարս) ավտոճանապարհի միջնամասում՝ Թերեք գետի ափին տեղի ունեցած փլվածքի հատվածում տարվող աշխատանքների վերաբերյալ:
Հունիսի 11-ի դրությամբ՝ Վրաստանի ճանապարհների շինարարության դեպարտամենտից ստացված տեղեկատվության համաձայն՝ ճանապարհը դեռևս փակ է:
Կատարվում են համապատասխան աշխատանքներ այն վերաբացելու ուղղությամբ: Աշխատանքների ընթացքում առաջանում են որոշակի դժվարություններ, տեղի են ունենում նոր փլուզումներ, որոնք խոչընդոտում են ավտոճանապարհի մաքրման և վերականգնման աշխատանքներին:
Վրացի գործընկերների հաղորդմամբ՝ աշխատանքների ավարտն ակնկալվում է հունիսի 14-15-ն ընկած ժամանակահատվածում, եթե նոր խոչընդոտներ ի հայտ չգան:
Գվելեթի-Դարիալ (Ներքին Լարս) ավտոճանապարհը բացվելուն պես ՀՀ տրանսպորտի և կապի նախարարությունը կտրամադրի տեղեկատվություն:
ՀՀ տրանսպորտի և կապի նախարարության լրատվական ծառայություն
