«Հյուսիս-հարավ» ծրագրի ընթացքի մասին հանրության պատշաճ կտեղեկացնե՞ն
ՀՀ տրանսպորտի և կապի նախարարի տեղակալ Արթուր Առաքելյանը հունիսի 11-ին հանդիպեց «Հյուսիս-հարավ» ներդրումային ծրագրի շինարարական աշխատանքներն իրականացնող «Կորսան Կորվիամ Կոնստրուկսիոն» ընկերության և շինարարական աշխատանքների վերահսկումն իրականացնող «Սաֆեժ-էպտիսա» ընկերության ներկայացուցիչներին։
Հանդիպման ընթացքում «Կորսան Կորվիամ Կոնստրուկսիոն» և «Սաֆեժ-էպտիսա» ընկերությունների պատասխանատուները ներկայացրին ծրագրի շրջանակներում կատարված և կատարվող աշխատանքների մասին զեկույց։
Նշվեց, որ շատ կարևոր է, որպեսզի Տրանշ 1-ի Արտաշատ-Աշտարակ հատվածը շահագործման հանձնվի բարձր որակով և պայմանագրով սահմանված ժամկետներում։
Արթուր Առաքելյանը հանդիպման մասնակիցներին հորդորեց գործել առավելագույնս թափանցիկ, որպեսզի «Հյուսիս-հարավ» ծրագրի իրականացման ընթացքի մասին իրազեկված լինեն շահագրգիռ բոլոր կազմակերպությունների պատասխանատուներն ու հանրությունը։
Տեխնիկական հսկողություն իրականացնող «Սաֆեժ-էպտիսա» ընկերությանը հանձնարարվեց լրացուցիչ միջոցներ ձեռնարկել՝ աշխատանքների որակի հսկողությունը սահմանված կարգով ուժեղացնելու ուղղությամբ։
ՀՀ տրանսպորտի և կապի նախարարության լրատվական ծառայություն
