Երևանի Բրյուսովի անվան լեզվաբանական համալսարանի ռեկտորը զգուշացրել է, ով «պարտադիրից» հրաժարվի՝ կազատվի
«Դեմ եմ» նախաձեռնության անդամ Սրբուհի Ղազարյանն այսօրվա ասուլիսում հայտարարեց, որ իրենք բազմաթիվ նամակներ են ստացել Երևանի Բրյուսովի անվան լեզվաբանական համալսարանից, որտեղ նշված է, որ հաշվապահությունում չեն վերցնում պարտադիր կուտակային համակարգից հրաժարվելու մասին իրենց դիմումները՝ ասելով, թե ռեկտորն ասել է՝ ով դիմում ներկայացնի, միաժամանակ պետք է ներկայացնի նաև աշխատանքից ազատվելու դիմումը: Ըստ Ս. Ղազարյանի՝ նմանատիպ նամակներ իրենք ստացել են նաև Հերացու անվան բժշկական համալսարանից, «Գրանդ Տոբակո» ընկերությունից, Նորք Մարաշ բժշկական կենտրոնից: Կան նաև բարեխիղճ գործատուներ, օրինակ, ըստ Ս. Ղազարյանի՝ Պոլիտեխնիկ ինստիտուտում կա գործատուի վարքագծի փոփոխություն, իսկ Սեբաստացու անվան կրթահամալիրը, Սլավոնական համալսարանը, ԵՊՀ-ն և Հովհ. Թումանյանի անվան տուն-թանգարանը ընդհանրապես նման պահանջներ չեն ներկայացնում իրենց աշխատակիցներին:
