Օբաման Օլանդին կոչ է արել ռազմանավեր չվաճառել Ռուսաստանին
France-Presse լրատվական գործակալության փոխանցմամբ՝ ԱՄՆ նախագահ Բարաք Օբաման Բրյուսելում G7-ի գագաթաժողովի արդյունքներով մամուլի ասուլիսի ժամանակ հայտարարել է, որ Ֆրանսիան պետք է դադար վերցնի Ռուսաստանի հետ ռազմական համագործակցությունում:
Օբաման մանրամասնել է, որ խոսքը գնում է Ռուսաստանին «Միստրալ» ռազմանավեր վաճառելու մասին՝ ընդգծելով, որ դրա հետ կապված իր մտահոգությունները հայտնել է իր ֆրանսիացի գործընկեր Ֆրանսուա Օլանդին:
Օբաման հայտարարել է, որ Ռուսաստանի հանդեպ նոր պատժամիջոցները կարող են սահմանվել մեկ ամսվա ընթացքում, եթե նա չփոխի Ուկրաինայի հանդեպ իր քաղաքականությունը:
Օբաման հավելել է, որ դրանից խուսափելու համար Ռուսաստանը պետք է համագործակցի Ուկրաինայի նոր իշխանությունների հետ և դադարի աջակցել Ուկրաինայի արևելքում գործող անջատողականներին:
Ռուսաստանն ու Ֆրանսիան «Միստրալ» ռազմանավերի շուրջ գործարքը ստորագրել են դեռևս Դմիտրի Մեդվեդևի նախագահության ժամանակ: Գործարքը գնահատվել էր 1.2 միլիարդ եվրո:
Այդ գործարքն ԽՍՀՄ-ի փլուզումից հետո Ռուսաստանի կողմից Արևմուտքից ռազմական տեխնիկա գնելու մասին առաջին պայմանագիրն է:
