Էրդողանը CNN-ին մեղադրել է երկրում լրտեսական ու սադրիչ գործունեություն ծավալելու մեջ
Թուրքական Anadolu լրատվական գործակալության փոխանցմամբ՝ Թուրքիայի վարչապետ Ռեջեփ Էրդողանն իր գլխավորած «Արդարություն ու զարգացում» կուսակցության (ԱԶԿ) անդամների առաջ ունեցած ելույթում կտրականապես դատապարտել է ամերիկյան CNN հեռուստաընկերության գործունեությունը:
Էրդողանի խոսքերով՝ հեռուստաալիքի լրագրողները միտումնավոր կրքեր են բորբոքել, ինչն էլ վերջին հաշվով անցած շաբաթ անկարգությունների է հանգեցրել Ստամբուլի «Թաքսիմ» հրապարակում.
«Միջազգային ԶԼՄ-ները, որոնք Ստամբուլ էին ժամանել սադրիչ և ուռճացված ռեպորտաժներ անելու համար, մնացին դատարկաձեռն»: Շաբաթվա բողոքի ակցիաների ժամանակ CNN-ի լրագրողներին ձերբակալել էին ակցիաները ուղիղ եթերով լուսաբանելիս՝ նրանց մեղադրելով «դավաճանության» մեջ:
Էրդողանը հիշեցրել է, որ CNN Internetional-ը նախորդ տարի օրական 8 ժամ լուսաբանել է «Գեզիի» դեպքերը:
