Իրաքը Թուրքիային մեղադրել է երկկողմ պայմանավորվածություններն ու ՄԱԿ-ի բանաձևերը խախտելու մեջ
Ռուսական РИА Новости լրատվական գործակալության փոխանցմամբ՝ Իրաքն օտար ընկերություններին զգուշացրել է Իրաքյան Քրդստանի նավթի գնման հարցում՝ առանց երկրի կենտրոնական իշխանությունների իրազեկվածության: Այս մասին նշված է Իրաքի նավթարդյունաբերության նախարարության տարածած հայտարարության մեջ:
Թուրքիան մայիսի 23-ից սկսել է Իրաքյան Քրդստանի նավթի ներկրումը: Թուրքիայի Ջեյհան նավահանգստից մոտ 1 միլիոն բարել նավթ բեռնվել է United Leadership լցանավն ու ուղարկվել է Եվրոպա:
Իրաքյան կողմը երկրի դաշնային կառավարության ու նավթարդյունաբերության նախարարության թույլտվության բացակայության պայմաններում երկրի սահմաններից նավթի դուրս բերումը որակել է որպես «մաքսանենգ նավթ»: Պաշտոնական Բաղդադը սպառնացել է դատի տալ այն ընկերություններին, որոնք կսկսեն վաճառել այդ նավթը:
Իրաքը Թուրքիային մեղադրել է երկկողմ պայմանավորվածություններն ու ՄԱԿ-ի բանաձևերը խախտելու մեջ, որոնց համաձայն, իրաքյան նավթի արտահանմամբ պետք է զբաղվի SOMO ազգային ընկերությունը, իսկ դրանից ստացված բոլոր եկամուտները պետք է ուղղվեն ԱՄՆ-ում բացված հատուկ հաշվեհամար:
