Ուկրաինայում լարված իրավիճակը պահպանվում է. Տիմոշենկոն ժողովրդական դիմադրություն է ստեղծում
Ուկրաինայի նախագահի թեկնածու, «Բատկիվշչինա» կուսակցության առաջնորդ Յուլյա Տիմոշենկոն մտադիր է ժողովրդական դիմադրության շարժում ստեղծել եւ անձամբ գլխավորել այն, հաղորդում է «Интерфакс» գործակալությունը` վկայակոչելով ապրիլի 14-ի երեկոյան ուկրաինական ICTV հեռուստաալիքին տված նրա հարցազրույցը:
«Ես որոշել եմ բառացիորեն այս րոպեից անել ամեն ինչ` աջակցելու համար դիմադրության ժողովրդական շարժմանը, որը հարկավոր է ստեղծել այն անձանցից, ովքեր կամավոր կերպով պատրաստ են հիմա պաշտպանել Ուկրաինան»,-հայտարարել է Տիմոշենկոն:
Նա նաեւ նշել է, որ շարժման մեջ կընդգրկվեն զինվորականներ եւ նախկին հատուկջոկատայիններ եւ ավելացրել է, որ ապրիլի 15-ի առավոտյան կանցկացնի շտաբի առաջին նիստը:
Տիմոշենկոն նաեւ հայտարարել է, որ Կիեւի կենտրոնում հարյուրավոր զինված անձինք շրջափակում են խորհրդարանի շենքը եւ կոչ է արել պատգամավորներին` անհապաղ գնալ ռադայի մոտ: «Սկսվում է նույն սցենարը, ինչ Դոնեցկում»,-հայտարարել է նա:
