Ղրիմի խորհրդարանը որոշում է ընդունել Ղրիմը Ռուսաստանին միացնելու մասին
Ուկրաինական UNIAN լրատվական գործակալության փոխանցմամբ՝ Ղրիմի Գերագույն ռադան որոշում է ընդունել Ղրիմը Ռուսաստանին միացնելու մասին՝ որպես Ռուսաստանի Դաշնության սուբյեկտ: Այդ որոշման օգտին քվեարկել է 78 պատգամավոր:
Ղրիմի փոխվարչապետ Ռուստամ Թեմիրգալիևը սրանից առաջ հայտարարել է, որ Ղրիմի Գերագույն ռադան որոշում է ընդունել Ղրիմի կարգավիճակի մասին հանրաքվեն անցկացնել մարտի 16-ին: Դրանում բարձրացվելու է երկու հարց. Ռուսաստանին Ղրիմի միանալը և Ղրիմում 1992 թվականի Սահմանադրության վերականգնումը:
Հիշեցնենք, որ Ռուսաստանի Պետդումայում առաջ էր քաշվել մի օրինագիծ, որը դյուրացնում էր Ռուսաստանի Դաշնության կազմում նոր սուբյեկտի ներառումը: Դա մասնավորապես առնչվում էր նրան, որ այլ երկրների մի մասին Ռուսաստանի կազմում ներառելու համար այլևս չի պահանջվելու նաև տվյալ երկրի համաձայնությունը: Դրա համար բավարար կլինի միայն հանրաքվեն:
