Երիտասարդ բնակչության թվաքանակով Թուրքիան Եվրոպայի առաջատարն է
Թուրքական Dünya Bülteni լրատվական կենտրոնի փոխանցմամբ` Թուրքիայի երիտասարդ բնակչությունն իր թվաքանակով գերազանցել է ընդհանուր առմամբ եվրոպական 24 երկրի երիտասարդ բնակչությանը:
Թուրքիայում երիտասարդ բնակչության թվաքանակը կազմում է 18.8 միլիոն մարդ, որով նա հանդիսանում է Եվրոպայում ամենամեծ երիտասարդ բնակչություն ունեցող երկիրը: Եվրոպական վիճակագրական տվյալներով` նախորդ տարի Թուրքիայում 15-29 տարեկան մարդկանց քանակը կազմել է 18.862.319 մարդ, որով և նա դարձել է Եվրոպայի առաջատարը:
Երիտասարդ բնակչության թվաքանակով Թուրքիան գերազանցել է 24 եվրոպական երկրի երիտասարդ բնակչությանը` միասին վերցրած: Բացի այդ, Թուրքիան իր երիտասարդ բնակչության թվաքանակով 2013 թվականին գերազանցել է եվրոպական 29 երկրից յուրաքանչյուրի ընդհանուր բնակչությանը:
Երիտասարդ բնակչության քանակով Եվրոպայում երկրորդ տեղը զբաղեցրել է Գերմանիան` ավելի քան 14 միլիոն մարդ: Երրորդ տեղում Մեծ Բրիտանիան է` 12.5 միլիոն երիտասարդ, ապա գալիս են Ֆրանսիան` 11.8 միլիոն մարդ, և Իտալիան` 9.162.927 երիտասարդ:
Եվրոպայում ամենափոքրաթիվ երիտասարդ բնակչությունն ունեցող երկիրը Լիխտենշտեյնն է: Այս երկրում 15-29 տարեկանների քանակը կազմել է 6680 մարդ: Լյուքսեմբուրգում երիտասարդների քանակը կազմել է 10.289 մարդ:
ԵՄ-ի անդամ 28 երկրում երիտասարդ բնակչության քանակը կազմել է 90.810.118 մարդ: Դա մոտ 5 անգամ ավելին է` համեմատած Թուրքիայի երիտասարդ բնակչության թվաքանակի հետ: 17 երկրից բաղկացած Եվրոգոտում երիտասարդ բնակչության թվաքանակը կազմել է 56.824.089 մարդ:
Հիշեցնենք, որ այս տարվա հունվարի վերջին Թուրքիայի վիճակագրական վարչության (TÜİK) հրապարակած տվյալների համաձայն, 2013 թվականին Թուրքիայի բնակչությունը, 2012 թվականի հետ համեմատ, աճել է 13.7 տոկոսով (1.040.480 մարդով)՝ հասնելով 76.667.864 մարդու:
Դեռևս 2011 թվականի ամռանը TÜİK-ը կանխատեսել էր, որ Թուրքիայի բնակչությունը չի կարող հասնել 100 միլիոն մարդու: Կանխատեսվում էր, որ 2020 թվականին Թուրքիայի բնակչության քանակը կհասնի 81.778.000-ի, իսկ 2025 թվականին՝ 85.407.000-ի: 2046 թվականին այն կհասնի իր գագաթնակետին՝ 92.276.000-ի։
Դրանից հետո Թուրքիայի բնակչության աճի տեմպը կանգ է առնելու և սկսելու է հետընթաց ապրել։ Արդյունքում, 2060 թվականին Թուրքիայի բնակչության թվաքանակը կկազմի 88.870.000 մարդ, ինչպես որ կլինի դրանից 30 տարի առաջ (88.266.000 մարդ)։
