Արսեն Ավակովը Ղրիմում տեղի ունեցածը որակել է որպես «զինված ներխուժում ու օկուպացիա»
ZN.UA-ի փոխանցմամբ՝ Ուկրաինայի ներքին գործերի նախարար Արսեն Ավակովը Ղրիմում օդանավակայանների շրջափակումը որակել է որպես «զինված ներխուժում ու օկուպացիա»: Այս մասին նա գրել է Facebook-ի իր էջում.
«Տեղի ունեցածը գնահատում եմ որպես զինված հարձակում ու օկուպացիա, միջազգային բոլոր պայմանագրերի ու նորմերի խախտում: Դա ինքնիշխան երկրի տարածքում զինված արյունահեղության ուղիղ սադրանք է:
Դա ոչ թե ՆԳՆ-ի, այլ Ազգային անվտանգության ու պաշտպանության խորհրդի իրավասության մեջ է: Քանի դեռ չկա ուղիղ զինված բախում, պետք է խոսեն դիվանագետները»:
Նշվում է, որ Ավակովի խոսքերն առնչվել են Սևաստոպոլի «Բելբեկ» և Սիմֆերոպոլի օդանավակայանններին. ««Բելբեկի» օդանավակայանը շրջափակել են Ռուսաստանի նավատորմի մարտական ստորաբաժանումները:
Օդանավակայանի ներսում ուկրաինացի զինվորականներն ու սահմանապահներն են: Օդանավակայանը չի աշխատում: Զինված բախում դեռ չկա: Նույն վիճակն է տիրում «Սիմֆերոպոլի» օդանավակայանում: Կեսգիշերին մոտ 100 հոգանոց խումբը մտել է նրա տարածք»:
