Հայաստանի աշխատուժը նվազում է
Մինչ կառավարությունը խոսում է տարբեր ոլորտների զարգացումից, հեռանկարային ծրագրերից, դժվարին պայմաններում ապահովված տնտեսական առաջընթացներից, կատարված ու սպասվող ներդրումներից, միջազգային տարբեր վարկանիշներում ՀՀ դիրքերի բարելավումից և այլն, Հայաստանում հետզհետե նվազում են աշխատանքային մարդկային ռեսուրսները: Այն ռեսուրսները, առանց որոնց որևէ բարիքի ստեղծումը պարզապես անհնար է դառնում: Ընդ որում՝ այս գործընթացը գնալով ահագնանում է, իսկ անցած տարի աշխատանքյին ռեսուրսների արտահոսքը Հայաստանից շեշտակի է աճել: Այսպես, պաշտոնական տվյալներով, 2008 թ-ին ՀՀ-ում աշխատանքային ռեսուրսների թիվը եղել է 2 մլն 376.9 հազար մարդ, 2011 թ-ին՝ 2 մլն 360.0 հազար (2011-ի համեմատ նվազումը՝ 16.9 հազար), 2012-ին՝ 2 մլն 312.8 հազար (նվազումը՝ 47.2), իսկ 2013-ին՝ 2մլն 142 հազար մարդ (նվազումը՝ 170.8 հազար մարդ): Այս վերջին ցուցանիշը սարսափեցնող է: Ըստ ամենայնի՝ դա նաև արտագաղթի արտացոլումն է և ստացվում է, որ առնվազն 170.8 հազար մարդ հեռացել է երկրից, բնականաբար, շատերն էլ իրենց հետ տարել են իրենց երեխաներին՝ ՀՀ ապագա աշատանքային ռեսուրսները:
