Առանց Թևան Պողոսյանի
ԱԺ պաշտպանության, ազգային անվտանգության և ներքին գործերի մշտական հանձնաժողովի այսօրվա նիստին ներկա չէր հանձնաժողովի անդամ, «Ժառանգություն» խմբակցության քարտուղար Թևան Պողոսյանը, ով, ինչպես հայտնի է՝ հայտարարել էր, որ վայր է դնում պատգամավորական մանդատը:
Սակայն նիստի ընթացքոում քննարկվող նախագծերից մեկի հարակից զեկուցողը հենց Թևան Պողոսյանն էր, ով, ըստ կարգի, պետք է նախագծի վերաբերյալ իր կարծիքը հայտներ: Հանձնաժողովի նախագահ Կորյուն Նահապետյանն ասաց, որ «հայտնի պատճառներով» Թևան Պողոսյանը բացակայում է և հայտարարեց, որ եթե հաջորդ նիստին էլ Թևան Պողոսյանը որպես հարակից զեկուցող չներկայանա, ապա նրան փոխարինելու անհրաժեշտություն կլինի։
Նշենք, որ Թևան Պողոսյանը նաև ԱԺ արտաքին հարաբերությունների և Տնտեսական հարցերով մշտական հանձնաժողովների անդամ է:
