Սերժ Սարգսյանը` Տիգրան Մանսուրյանի մասին. «Դուք հայ արվեստագետի, մտավորականի և քաղաքացու չափանիշ եք»
Նախագահ Սերժ Սարգսյանը շնորհավորական ուղերձ է հղել ՀՀ ժողովրդական արտիստ, Սուրբ Մեսրոպ Մաշտոցի շքանշանի ասպետ, ՀՀ և ՀԽՍՀ պետական և միջազգային բազմաթիվ մրցանակների դափնեկիր Տիգրան Մանսուրյանին՝ ծննդյան 75-ամյակի առթիվ:
«Մեծարգո Տիգրան Մանսուրյան,
Ջերմորեն շնորհավորում եմ Ձեզ ծննդյան 75-րդ տարեդարձի առթիվ: Տասնամյակներ շարունակ Ձեր գործունեությամբ Դուք վայելում եք մեր ժողովրդի սերն ու անմնացորդ հարգանքը: Մեծ է Ձեր ներդրումը հայ երաժշտարվեստի զարգացման և հանրահռչակման գործում: Այսօր դուք միջազգային ճանաչում և անուն վաստակած այն հայորդիներից եք, ում ստեղծագործությունները համարվում են դասական արժեքներ: Դրանք հնչեցվում են աշխարհի ամենապատվաբեր սրահներում: Դուք հայ արվեստագետի, մտավորականի և քաղաքացու չափանիշ եք, որով սերունդներ են դաստիարակվելու:
Կրկին շնորհավորելով հոբելյանի առթիվ՝ մաղթում եմ Ձեզ առողջություն և ստեղծագործական նոր նվաճումներ՝ ի փառս մեր մշակույթի և ժողովրդի»,-ասված է ՀՀ Նախագահի շնորհավորական ուղերձում:
ՀՀ Նախագահի աշխատակազմ
