Զանգվածային ոչնչացման զենքի արտադրությունը չի մտնում Իրանի ազգային շահերի թվում. Ռոուհանի
Իրանական IRNA լրատվական գործակալության փոխանցմամբ՝ Իրանի նախագահ Հասան Ռոուհանին Թեհրանում տեխնոլոգների ու հետազոտողների հանրապետական փառատոնի բացման ժամանակ հայտարարել է, որ Իրանի պաշտպանական դոկտրինը հիմնված չէ զանգվածային ոչնչացման զենքի (ԶՈԶ) արտադրման վրա՝ ներառյալ միջուկային զենքը:
Ռոուհանին, վկայակոչելով միջուկային զենքի ստեղծման վերաբերյալ Իրանի գերագույն առաջնորդ, այաթոլլահ Ալի Խամենեիի խոսքերը, ընդգծել է, որ Իրանը չի իրականացնում միջուկային զենքի ստեղծման հետ կապված հետազոտություններ: Ռոուհանիի խոսքերով՝ ԶՈԶ-ի արտադրությունը չի մտնում Իրանի ազգային շահերի թվում:
