Ադրբեջանի պաշտպանության նախարարին հրավիրել են Իրան
Իրանական Mehr լրատվական գործակալության փոխանցմամբ՝ Բաքվում Իրանի դեսպան Մոհսեն Փակ Այինն Ադրբեջանի պաշտպանության նախարար Զաքիր Հասանովին է հանձնել Իրան այցելելու հրավերը: Իրանի պաշտպանության նախարար Հոսեին Դեհգհանը տվյալ հրավերն ուղարկել է դեկտեմբերի 10:
Նույն աղբյուրի համաձայն, Իրանի պաշտպանության նախարարը Հասանովին առաջարկել է ամրագրել պաշտպանական ոլորտում երկկողմ հարաբերությունները: Ուշագրավ է, որ Ադրբեջանի ՊՆ-ի մամլո ծառայությունն իր տարածած հաղորդագրությունում վստահեցրել էր, որ իրանցի դեսպանը Զաքիր Հասանովի հետ քննարկել է Ղարաբաղյան հակամարտության կարգավորման հարցը:
Հիշեցնենք, որ Զաքիր Հասանովը տարածաշրջանի ներկայիս ռազմա-քաղաքական իրավիճակը քննարկել էր երկրում Ռուսաստանի ու Չինաստանի դեսպանների հետ:
