Ահաբեկիչները ներթափանցել են Եմենի պաշտպանության նախարարության տարածք. Al Arabiya
Al Arabiya հեռուստաալիքի փոխանցմամբ՝ Եմենի մայրաքաղաք Սանայում գտնվող Պաշտպանության նախարարության տարածքում մարտեր են ընթանում անվտանգության ուժերի ու ահաբեկիչների միջև: Հարձակման են ենթարկվել նաև հոսպիտալն ու ռազմական երկու այլ հիմնարկ:
Առկա տվյալներով՝ մահապարտ-ահաբեկիչը պայթուցիկով լեցուն ավտոմեքենայով մոտեցել է համալիրի կենտրոնական դարպասների մոտ և գործի է դրել պայթուցիկ սարքը: Դրանից անմիջապես անց Եմենի զինծառայողների հագուստով զինյալները մուտք են գործել գերատեսչության տարածք:
Հարձակման հետևանքով զոհվել ու վիրավորվել են տասնյակ մարդիկ: Դեպքի վայր են բերվում բանակային ու ոստիկանական ստորաբաժանումներ, ինչպես նաև բժիշկներ, որոնց աշխատանքը բարդացնում է շարունակվող փոխհրաձգությունը: Ականատեսների վկայությամբ, Պաշտպանության նախարարության շենքին հասցվել է զգալի վնաս:
Ահաբեկչական որևէ խմբավորում դեռ չի ստանձնել հարձակման պատասխանատվությունը: Եմենի հարավում ու արևելքում գործում է «Ալ-Քաիդայի» մասնաճյուղը՝ «Ալ-Քաիդան Արաբական թերակղզում»:
