Իժևսկում ձերբակալվել է վերջերս ծեծի ենթարկված «օրենքով գող» Գևորգ Գրիգորյանը
Ինչպես գրում է «Прайм Крайм» գործակալությունը, Նոյեմբերի 20-ին Իժևսկում ձերբակալվել է 32-ամյա հայազգի «օրենքով գող» Գևորգ Գրիգորյանը, ով քրեական շրջանակներում ավելի շատ հայտնի է որպես Գևորիկ Նեֆտեկամսկի։ Անձնական խուզարկությամբ նրա մոտից հայտնաբերվել է 3.95 գրամ հինոլին կոչվող թմրանյութ, որը համարվում է առանձնապես խոշոր չափ և նախատեսում է ազատազրկում՝ մինչև 10 տարի ժամկետով։
Նախկինում խարդախության համար դատապարտված Գրիգորյանը թագադրվել է նախորդ տարվա դեկտեմբերի 14-ին՝ Դեդ Հասանի կլանի անդամների կողմից։ Նա համարվում է Բաշկորտոստանի ամենաազդեցիկ քրեական հեղինակություննիերից մեկի՝ Եգոր մականունով Իգոր Մոլոդցովի վստահելի անձանցից մեկը։
Ինչպես նախկինում տեղեկացրել էինք, այս տարվա հոկտեմբերին Գևորիկի և հակառակ կլանի ներկայացուցիչ Ահմեդ Սուտուլիի միջև Մոսկվայում կոնֆլիկտ էր եղել, որի ժամանակ հայազգի հեղինակությանը ծեծի էին ենթարկել։ Սակայն միջադեպի շարունակության և Գևորիկի կողմից վրեժխնդրության փորձերի վերաբերյալ որևէ տեղեկություն չի ստացվել։ Իսկ եթե դատարանը նրան մեղավոր ճանաչի, ապա հաշիվները մաքրելու համար նա ստիպված կլինի մի քանի տարի սպասել։
