Վրաստանի ՊՆ-ը Սաակաշվիլիին կոչ է արել չհրապարակել պետական գաղտնիք պարունակող տեղեկատվություն
Новости-Грузия լրատվական գործակալության փոխանցմամբ՝ Վրաստանի պաշտպանության նախարարությունը վրդովմունք ու զարմանք է հայտնել նախագահ Միխեիլ Սաակաշվիլիի արած այն հայտարարության կապակցությամբ, թե 2008 թվականից հետո պաշտպանական ամրություններ են կառուցվել Թբիլիսիի շուրջ:
Սաակաշվիլին ընդգծել էր, որ նախկինում դա պետական գաղտնիք էր, սակայն ներկայումս Վրաստանի թշնամին արդեն տեղյակ է այդ մասին: Դրա հետ կապված՝ Վրաստանի ՊՆ-ը հայտարարություն է տարածել, որում նշված է.
«Պետության գերագույն հրամանատար, նախագահ Միխեիլ Սաակաշվիլիի հայտարարությունը վնաս է հասցնում Վրաստանի պաշտպանունակությանը: Վրաստանի ՊՆը-ը և զինված ուժերը ունակ են ապահովել պաշտպանունակություն և համապատասխան կերպ արձագանքել անվտանգության մարտահրավերներին:
Պաշտպանական կառույցների գտնվելու վայրի և տիպի մասին ցանկացած տեղեկատվության տարածում սպառնում է Վրաստանի անվտանգությանը: ՊՆ-ը նախագահի աշխատակազմին ու Վրաստանի Անվտանգության խորհրդի ապարատին կոչ է անում մեծ զգուշավորությամբ վերաբերել պետական գաղտնիք պարունակող տեղեկատվության տարածմանը»:
