Խուզարկություններ՝ քրեական գործի շրջանակներում. մեծ քանակի զենք-զինամթերք է հայտնաբերվել

Սեպտեմբերի 23-ին, ժամը 12.00-ին, Տավուշի մարզի ընդհանուր իրավասության առաջին ատյանի դատարանի որոշմամբ` ոստիկանության Տավուշի մարզային վարչության և Իջևանի բաժնի ծառայողները մի քրեական գործի շրջանակներում խուզարկություն են կատարել 1986 թ. ծնված Լեռնիկ Գ.-ի տանը և օժանդակ կառույցներում, որի ժամանակ տանը կից օժանդակ կառույցում` մուտքից դեպի աջ տեղադրված չգործող գազօջախի ջեռոցում` պոլիէթիլենային փաթեթի մեջ, հայտնաբերվել և առգրավվել է մոտ 15 մ երկարության կրակատար քուղի փաթեթ և 5 սմ երկարությամբ, դեռևս չպարզված տիպի 3 պայթուցիչ:

Լեռնիկ Գ.-ի հայրը` 1961 թ. ծնված Պետրոս Գ.-ն, հայտնել է, որ նշված իրերը պատկանում են իրեն, որոնք ինքը ձեռք է բերել 2012 թ.` հետագայում օգտագործելու համար:

Հայտնաբերվածն ուղարկվել է փորձաքննության:

Կատարվում է նախաքննություն:

Նույն քրեական գործի շրջանակներում խուզարկություն է կատարվել 1969 թ. ծնված Արթուր Վ.-ի բնակարանում, որի ժամանակ ննջասենյակից հայտնաբերվել և առգրավվել է «ՏՕԶ» տիպի, ողորկափող հրացան, 3 հատ ինքնաշեն և 2 հատ գործարանային արտադրության որսորդական հրացանի փամփուշտներ, որսորդական դանակ, «ՏՕԶ» տիպի հրացանի 8 փամփուշտ և փամփուշտի նմանվող առարկա:
Հայտնաբերվածն ուղարկվել է փորձաքննության:

Կատարվում է նախաքննություն:

Նույն քրեական գործի շրջանակներում ոստիկանները խուզարկություն են կատարել 1963 թ. ծնված Գառնիկ Ե.-ի տանը և օժանդակ շինություններում, որի ժամանակ հայտնաբերվել և առգրավվել է 7.62 մմ տրամաչափի «ՍԿՍ» տիպի հրացան, 12 տրամաչափի օդամղիչ հրացան, 4.5 մմ տրամաչափի օդամղիչ հրացան, «ՊՊ» մոդելի 9 մմ տրամաչափի գազային ատրճանակ, 9 մմ տրամաչափի 9 փամփուշտ, 1 պայթուցիչ, 7.62 մմ տրամաչափի ինքնաձիգի 2 պարկուճ, պլաստմասե գլան` լիցքավորված վիճակում, 12 մմ տրամաչափի հրացանի 7 փամփուշտ, որսորդական դանակ, 7.62 մմ տրամաչափի ինքնաձիգի 5 փամփուշտ` փամփշտակալով, 7.62 մմ տրամաչափի ինքնաձիգի 12 պարկուճ և թղթապանակ` փաստաթղթերով:

Հայտնաբերվածն ուղարկվել է փորձաքննության: