Քեֆչիների քաղաքը
Աբովյան քաղաքում գործում են տասնյակ ռեստորաններ ու ժամանցային վայրեր: Մայրաքաղաքային գների համեմատ մատչելի լինելը հաճախ գրավիչ է դառնում անգամ մեծահարուստների համար, որպեսզի իրենց տոնական առիթներն Աբովյան քաղաքում նշեն:
Գրեթե ամեն օր, ուշ երեկոյան, իսկ ավելի հաճախ՝ կեսգիշերն անց, բուռն հրավառության ձայները խաթարում են բնակիչների անդորրը:
Աբովյանի բնակչուհի Հեղինե Հովհաննիսյանը ստեղծված իրավիճակին բուռն է արձագանքում. «Ինչ-որ տեղ կարելի է հասկանալ, երբ հրավառությունը ամռան, հանգստի շրջանում է: Բայց ո՛չ ամեն օր ու այն էլ՝ կեսգիշերին: Ես բարձրահարկ շենքում եմ բնակվում, ու երեխայիս ննջասենյակի կողմից ամեն անգամ աղմուկ է, դիվադադար եղած երեխային ստիպված հանգստացնում եմ: Մինչև ե՞րբ կարելի է այս ամենը հանդուրժել»,- ասում է Հեղինե Հովհաննիսյանը:
168.am-ի այն հարցին, թե բնակիչները ոստիկանություն կամ քաղաքապետարան փորձե՞լ են դիմել այդ խնդրով, պատասխանեցին, որ անիմաստ են համարում. «Լսեք, ի՞նչ ոստիկանություն: Սա Աբովյանն է՝ օլիգարխների քաղաքը: Մարդիկ այստեղ ահ ու սարսափի մեջ են ապրում»,- ասում է տիկին Լուսիկը:
Ի դեպ, նշենք, որ շուրջ 60 հազար բնակչություն ունեցող քաղաքի տարբեր հատվածներում՝ բնակելի շենքերին շատ մոտ են գտնվում հիմնական ռեստորանները:
