Սահմանադրությունում ցանկացած փոփոխություն կարող են ձևակերպել իբր թե ընդունվել է. իրավապաշտպանը դեմ է, ՀՅԴ պատգամավորը՝ կողմ
Իրավապաշտպան Արտակ Զեյնալյանը հավանական է համարում այն, որ սահմանադրական բարեփոխումների անվան տակ Սերժ Սարգսյանը նպատակ ունի կառավարման համակարգը դարձնել խորհրդարանական և արհեստականորեն երկարաձգել իր պաշտոնավարումը։ Միևնույն ժամանակ, ըստ նրա, այսօր նախագահին առընթեր սահմանադրական բարեփոխումների մասնագիտական հանձնաժողով ստեղծելու ոչ ժամանակն էր, ոչ էլ իմաստ ուներ դրան գնալու։
«Երկրի առաջ այնքան կարևոր հարցեր կան ծառացած, որ դրա ժամանակը չէր և ընդհանրապես դրա իմաստն էլ չկար, բայց միևնույնն է, իրենք ինչ ուզեն՝ կգրեն և ինչքան ուզեն՝ կխփեն։ Անիմաստ բան է դա, ձևական, որը բովանդակություն չունի»,-Tert.am-ի հետ զրույցում ասել է իրավապաշտպանը և հավելել, որ ցանկացած փոփոխություն կարող են ձևակերպել «իբր թե ընդունվել է»։
«Հայ հեղափոխական դաշնակցություն» խմբակցության պատգամավոր Արծվիկ Մինասյանը այլ կարծիքի է։ Ըստ նրա, եթե կառավարման համակարգը դարձվի խորհրդարանական, դա կլինի միայն հօգուտ ժողովրդի՝ անկախ նրանից, թե այսօր նախագահն ով է։
Այն դիտարկմանը, թե այդուհանդերձ ՀՀԿ մամուլի խոսնակ, ԱԺ փոխխոսնակ Էդուարդ Շարմազանովը նշել է, որ կառավարման համակարգի փոփոխության հարց իշխանության օրակարգում չկա, Արծվիկ Մինասյանը նկատել է, թե շատ վատ է, որ չկա։
«Ես շատ կուզենայի, որ օրակարգում դրված լինի, սա սկզբունքային հարց է, անկախ նրանից, թե այսօր նախագահն ով է և ինչ արժեքների է դավանում։ Պառլամետական կառավարությունն այսօր միակ ճիշտ ձևն է, որը հնարավորություն կտա նախ չեզոքացնել քաղաքական մենաշնորհի ինստիտուտը, երկրորդ՝ երկիրը փոխելու բազմակարծության միջոցով կայուն զարգացման հարթությունում, և վերջապես երրորդ կարևոր փաստը՝ միանձյա որոշումից անցում կկատարվի ընդհանրական դիքրորոշման սկզբունքին»,-Tert.am-ի հետ զրույցում ասել է ՀՅԴ պատգամավորը և ընդգծել, թե խորհրդարանական կառավարման ձևին անցնելուց հետո ինչ համակարգ կձևավորվի՝ արդեն այլ հարց է։
Ինչ վերաբերում է այն տեսակետներին, թե հավանական է, որ Սերժ Սարգսյանը դրանով իր պաշտոնավարման ժամկետն է ավելացնում, Արծվիկ Մինասյանը պատասխանել է. «Չեմ ուզում դա կապել ներկա նախագահի դիրքորոշման հետ։ Ավելին ասեմ, նման համակարգին անցնելու դեմ էր արտահայտվել առաջին հերթին հենց Սերժ Սարգսյանը»։
Մանրամասն` սկզբնաղբյուր կայքում:
