Մանրամասներ Լոռու մարզում տեղի ունեցած դաժան սպանությունից
Սեպտեմբերի 4-ին Լոռու մարզում կրկին դաժան սպանություն է տեղի ունեցել: Այս անգամ որդին սպանել է հորը: 168.am-ի հետ զրույցում Ուռուտ համայնքի ղեկավար Սերգո Ջուլհակյանն ասաց, որ ընտանիքում բնակվել են հայրը, մայրը և տղան: Գյուղապետի փոխանցմամբ ՝ տղան հոգեկան խնմդիրներ է ունեցել, հակումներ ուներ նաև ալկոհոլի նկատմամբ. «Ինքը Ռուսաստանում էր, մի 2 ամիս առաջ ա եկել գյուղ»: Թե ի՞նչն է եղել սպանության պատճառը, գյուղապետը չնշեց, միայն ասաց, որ որդին դեպքի օրը խմած է եղել. «Գուցե ընտանեկան հարց է եղել, ես չեմ կարող ասել»: Հայրասպան որդին՝ Վանիկ Ջուլհակյանը, ամուսնացած չէր:
Ինչպես ավելի վաղ հայտնել էր 168.am-ը, սեպտեմբերի 4-ին, ժամը 22.20-ին, շտապօգնության կայանից ոստիկանության Ստեփանավանի բաժնում հաղորդում է ստացվել, որ բուժօգնություն ցուցաբերելու նպատակով կանչով մեկնելով 1965 թ. ծնված Սամվել Ջուլհակյանի տուն` նրան հայտնաբերել են մահացած: Մեկնած օպերատիվ խումբը նշված տանը հայտնաբերել է Ս. Ջուլհակյանի դիակը` կրծքավանդակի աջ մասում կտրած-ծակած վնասվածքի հետքով: Սեպտեմբերի 5-ին ոստիկանության Ստեփանավանի բաժնի ծառայողների ձեռնարկած օպերատիվ-հետախուզական և քննչական միջոցառումների շնորհիվ պարզվել է, որ սեպտեմբերի 4-ին, ժամը 21.00-ի սահմաններում, 1982 թ. ծնված Վանիկ Ջուլհակյանն իրենց տանը դանակով հարվածել է հոր` Սամվել Ջուլհակյանի կրծքավանդակի աջ մասին և պատճառել մահ: Հանցագործության գործիք դանակն առգրավված է: Վանիկ Ջուլհակյանը ձերբակալված է: Փաստի առթիվ սեպտեմբերի 5-ին ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ: Նախաքննությունը շարունակվում է:
